Матбабаев М. М. “Электр техникаси, электр механикаси ва электр технолгиялари” кафедраси

Индукцион ва диэлектрик қиздириш.
16 – Маъруза. Индукцион қурилмалар ва уларнинг турлари.
Режа:
1. Индукцион қурилмалар ишлашининг физик асослари.
2. Индукцион қурилмалар ва уларнинг турлари.


Таянч иборалар: Индукцион қурилмалар, диэлектрик усулда қиздириш, индуктор, тигель пўлат ўзакли индукцион печлар (индукцион канал типидаги печлар), пўлат ўзаксиз индукцион печлар (индукцион тигель типидаги печлар).
Индукцион қурилмалар ва диэлектрик қиздириш қурилмаларида электр энергияси тўғридан тўғри қиздириладиган маҳсулотларда иссиқлик энергиясига айлантирилади. Шунинг учун уларнинг самарадорлиги ва Ф.И.К лари билвосита қиздириш қурилмаларига қараганда анча юқори.
Индукцион қурилмаларнинг ишлаш принципи индукторнинг ўзгарувчан электромагнит майдонига жойлаштирилган металл жисм томонидан электромагнит энергияни ютишига (уюрмали токлар пайдо бўлганда) асосланган
Диэлектрик қурилмаларнинг ишлаш принципи конденсаторнинг ўзгарувчан электр майдонига жойлаштирилган диэлектрик материаллар иссиқлик энергияси ажратишига асоланган.
Белгиланишига кўра барча индукцион қиздириш қурилмалари (ИҚҚ) эритиш печлари, миксерлар ва қиздириш қурилмаларига бўлинади. Ўз навбатида эритиш печлари пўлат ўзакли (каналсимон) индукцион печлари ва пўлат ўзаксиз (тигель) индукцион печларига бўлинади. Индукцион қиздириш қурилмалари эса асосан икки гуруҳга, яъни тўлиқ қиздириш ва юза қиздириш қурилмаларига бўлиб ўрганилади. Бундай қурилмаларда паст ҳароратдаги ва юқори ҳароратдаги қиздириш технологик жараёнлари амалга оширилади.

Индукцион қурилмалари қуйидаги тартибда турларга бўлинади:

I.Вазифасига кўра индукцион қурилмалар учта турга бўлинади:
1.Эритиш печлари
2.Миксерлар
3.Қиздириш қурилмалари
Эритиш печлари металларни эритиш ва қуйиш температурасигача қиздириш учун хизмат қилади.
Миксерлар металларни қуйиш, суюқ ҳолатдаги металл температурасини тенглаштириш ва ушлаб туриш учун хизмат қилади.
Индукцион қиздириш қурилмалари маҳсулот ҳароратини ишлов бериш ҳароратигача олиб бориш учун хизмат қилади.