Масъул муҳаррир: академик Т. Н. Долимов, г м. ф д., проф. Тақризчилар

166-расм. Континент ёнбағрининг топографияси.

Материк этаги метрик ёнбағри ва океан ложаси орасидаги паст нишабликдаги, кучсиз тўлқинли текисликларни қамраб олади. Унинг кенглиги ўнлаб ва юзлаб километрларга, чуқурлиги эса 3000-5000 м га боради. Бунда чўкинди ётқизиқлар жуда қалин бўлади. Бундай катта қалинлик лойқа оқимлар (турбид) ёрдамида жуда катта ҳажмдаги материалларнинг келтирилиши билан боғлиқ.
Тинчокеани туридаги фаол континентал четлар атлантика туридагиларга қараганда рельефининг кескин парчаланганлиги ва юқори тектоник фаоллиги билан фарқланади. Улар денгиз котловиналари (Охота, Япония ва б.), ороллар ёйи (Курил, Япония ва б.) ва чуқурсув новлари орқали океан ложаси билан туташади.
Денгиз котловиналари овал ёки изометрик шаклдаги ботиқликлардан иборат бўлади. Уларнинг чуқурлиги 3-5 км га боради.
Ороллар ёйи – бу ўзининг чўққилари билан денгиз сатҳидан чиқиб турадиган сувости тоғларидир. Улар Тинч океанида кенг тарқалган. Командор-Алеут, Курил, Япон, Мариана ва бошқалар шулар жумласидандир. Ҳинд океанида Зонд ороллар ёйи, Атлантика океанида эса Антил ва Жанубий Антил ороллар ёйи мавжуд. Океан томондан ороллар ёйи чуқурсув новлари билан чегараланган бўлади ва улардан кейин Дунё океани ложаси бошланади.
Чуқурсув новлари оролли ёйлар билан чамбарчас боғлик, улар билан туташган, бу ёйларнинг ташқи ёнбағирлари бўйлаб чўзилган. Булар тор, баъзан деярли даралардек, кенглиги 100-120 км, чуқур, катта масофаларга чўзилган ботиқликлардир.
Деярли барча чуқурсув новлари Тинч океанининг ғарбий қисмида жойлашган. Жанубий Америкада фақат битта - Перу-Чили чуқурсув нови мавжуд.
Дунё океани ложаси. Дунё океани ложаси 3-4 дан 6 км гача бўлган чуқурликда жойлашган бўлиб, океанларнинг 50 % дан ортиқ майдонини эгаллайди. Унинг рельефида абиссал (юнонча «абисос» - тубсиз) текисликлар ҳамда абиссал сувости тепаликлари ва тоғлари ажратилади.
Абиссал текисликлар океанларнинг анча қисмини эгаллайди ҳамда Атлантик океанида чуқурлиги 2-3 км ва Тинч океанида чуқурроқ (6,5-6,9 км) котловиналардан иборат.
Сувости тепаликлари абиссал котловиналар орасида жойлашган бўлиб, улардан 1000 м дан ортиқ баланд кўтарилиб туради. Улар барча океанларда, айниқса Тинч океананида кенг тарқалган, океан ложаси майдонининг 80-85 % ни эгаллайди.
Сувости тоғларининг баландлиги 1000 м дан ортиқ бўлиб, якка ҳолда тарқалган ёки океан ложасида қатор ҳосил қилиб, тизилган. Улардан кўпчилиги конус шаклидаги сувости вулканлардан иборат. Тинч океанида уларнинг сони мингдан ортиқ, баъзилари вулкан ороллари занжири сифатида океан сатҳидан чиқиб туради (Гавай ороллари).
Сувости вулканлари тизмаси орасида 2-2,5 км чуқурликда жойлашган усти яссиланган гайоталар ҳам учрайди. Уларнинг ясси юзаси океан сатҳидан чиқиб турганлиги учун абразия – соҳилнинг тўлқинлар таъсирида емирилиши туфайли ҳосил бўлган; кейинчалик тектоник жараёнлар туфайли сув остида қолиб кетган. Гайоталар юзасида маржон рифлари, саёз сувли чўкиндилар ривожланган. Гайоталар барча океанларда учрайди.