Ma’ruza №3 Mavzu: Mashg‘ulotlar jarayonida sportchilar tayyorgarligining asosiy bo‘limlari

Uchinchi bosqich. Texnik tayyorgarlik bevosita musobaqaoldi tayyorgarlik doirasida tashkil etiladi va egallangan ko‘nikma va malakalarni takomillashtirishga, musobaqa dasturlarini modellashtirishga, ularning maqsadga muvofiq variativlik diapazonini va asosiy musobaqa shart – sharoitlariga nisbatan ishonchlilik darajasini kattalashtirishga yo‘naltiriladi. Bu bosqich tayyorgarlik davrining yakunlovchi qismidan boshlanadi va musobaqa davriga taalluqli bo‘ladi.

Harakatlarni o‘rganish va ularni bajarish texnikasini takomillashtirish jarayonida doimo xatoliklar vujudga keladi (9 - rasm). Ularni o‘z vaqtida aniqlash va vujudga kelish sabablarini belgilash sezilarli darajada texnik takomillashish jarayoni samaradorligini ifodalaydi.

Harakatlar tuzilmasining va jismoniy sifatlarning rivojlanish darajasini bir – biri bilan bog‘liqligi va o‘zaro bog‘lanishlari texnik mahoratni takomillashtirishning eng muhim uslubiy shartlaridan hisoblanadi. Sportchining jismoniy tayyorlanganlik darajasini uning sport texnikasini egallash darajasiga mosligi – sportda texnik tayyorgarlik uslubiyotining eng muhim qoidasidir.

Sport – texnik tayyorgarlik samaradorligiga dastlabki tayyorgarlik darajasi, individual xususiyatlar, tanlangan sport turi xususiyatlari, trenirovka siklining umumiy tuzilmasi va boshqa omillar ta’sir ko‘rsatadi.