М а р к е т и н г асосий маркетинг тушунчалари ва замонавий сўзларининг қисқача изоҳли луғати

Таъсир этиш иерархияси (hierarchy of effects) - бу потенциал харидорни товар ҳақида дастлабки, биринчи маротаба хабар олгандан (билгандан) сўнг, охирги харакати, яъни сотиб олишгача бўлган ўтиш босқичларининг кетма-кетлигидир. Ўтиш босқичлари (даврлари) ўз ичига қуйидагиларни олади: хабар топиш (билиш), қизиқиш, баҳолаш, синаб кўриш ва қарор қабул қилиш.
Тақдимот (презентация) (presentation) – бу маракетинг фаолиятида сотув жараёнининг поғоналаридан бўлиб, унда корхонанинг савдо вакили ўз маҳсулотининг хусусиятлари ҳақида харидорга оғзаки таъриф беради ва у маҳсулотни сотиб олиши натижасида қандай фойдаларга эга бўлишлигига истеъмолчининг диққатини жалб этади. Маҳсулот презентациясини турли хил кўринишда ўтказиш мумкин: аввалдан тайёрлаб қўйилган бир неча маротаба чиқишларда ишлатиладиган нутқдан фойдаланиш; умумий режага асосланиб, аммо корхона таклиф этган маҳсулотларга харидорларнинг муносабати ҳамда эҳтиёжларини ҳисобга олган ҳолда амалга ошириш ва, ниҳоят, эркин ҳолда, яъни харидорлар билан суҳбат ўтказишлар натижасида аниқланган талабни инобатга олган ҳолда ўтказиш. Агар маҳсулот нусхаларидан ва турли кўргазмали воситалардан (буклетлар, слайдлар, каталоглар ва бошқалардан) фойдаланилса, презентация жараёни янада самарали ўтади.
Тақсимлаш (distribution) – бу маркетинг комплексининг (4P) элементларидан биридир. Унинг моҳияти шундан иборатки, товарлар (хизматлар)ни мақсадли истеъмолчиларга, уларга керакли бўлган ассортиментда, керакли вақтда ва керакли жойга таклиф этиб, енгил етказиб беришни таъминлашдир. Фирмани тақсимлаш сиёсати ўз ичига қуйидагиларни олиши зарур: сотувни режалаштириш (товарнинг ҳажми ва ассортименти бўйича, ҳудудлар бўйича, тақсимот таркиблари, вақтлари бошқалар бўйича); товарлар (хизматлар)ни тақсимлаш каналларини шакллантириш; сотувни ташкил этиш ва тақсимлашни назорат қилиш. Тақсимлаш тизимида, унинг каналларини турлари ва ташкилий шаклларини танлаш бўйича қарорларни қабул қилиш, мақул келадиган ҳамкорлар ҳамда воситачиларни жалб этиш, бунинг учун тўғридан-тўғри маркетинг воситалари ва услубларидан фойдаланиш ҳамда бошқалар мақсадга мувофиқдир.