Lektsiya teksti Defektologiya (Logopediya) bakalavr ta`lim bag`dari 1-kurs ushin mo`lsherlengen Du`ziwshi

3. So`zdin` seslik ma`deniyatın ta`rbiyalaw. Bala en` birinshi gezekte tildin` seslik ta`repin iyelewi kerek yag`nıy seslerdi durıs ayta biliwi kerek. So`zdin` seslik ta`repi menen islesiw o`zbek, qaraqalpaq tilinin` fonetikası ha`m orfoepiyasına tiykarlanadı. Bala u`lken jastag`ılarg`a eliklep, so`zlerde pa`tti durıs qollanıwdı u`yrenip aladı, ana tilinin` intonatsiyalıq ta`repin o`zlestiredi ha`m so`zlerdi durıs aytıwg`a a`detlenedi. A`sirese, bala a`tirapındag`ılar menen so`yleskende a`lpayım tu`rde, da`l ha`m anıq so`ylewge u`yretiledi. Ha`r bir balada so`zdin` usınday ta`replerin ta`rbiyalaw, keleshek o`mirinde, yag`nıy mektepte, oqıw orınlarında bilim alıwında, erkin miynet etiwinde ja`ma`a`t, ja`miyet arasında o`z pikirlerin tolıq ha`m tu`sinikli etip aytıwda u`lken a`hmiyetke iye.

Egerde ta`rbiyashı balanın` so`zindegi, seslerdi aytıwındag`ı kemshilikler, dawıs ha`m tempke, diksiyasına (anıq, da`l so`ylew), so`zinin` mazmunlı ja`ne tu`sinikliligine itibar bermese, bunday kemshilikler menen mektepke barg`an bala bilimdi o`zlestire almaydı, keleshektegi jeke o`mirinde de o`z pikirin aytıwg`a qıynaladı, uyaladı, na`tiyjede so`ylemewge ha`reket etip, u`ndemeytug`ın, qızba bolıp qaladı. Bulardın` barlıg`ı onın` ruwxıy jaqtan rawajlanıwına da ta`sir etedi.