Labora-toriya jumislari

Plegafoniya
Bul usıl bronx, ókpe hám plevranıń saw hám kesellikleri waqtında dawıstı ótkeriw ózgesheligine tiykarlanǵan. Plegafoniya waqtında bir adam haywandı uslap turadı, ekinshi adam plessimetr hám perkussion balǵasha menen kegirdekti taqıllatadı. Sol waqtında vrach ókpeni esitip, dawıstıń esitiliwin anıqlaydı.
Ókpe toqıması normada dawıstı jaman ótkeriwi nátiyjesinde urılǵan dawıs zorǵa, júdá uzaqtan esitiledi. Ókpe keselliklerinde alveolalar suyıqlıq menen hám ókpe tıǵızlasadı (pnevmoniya ). Bunıń nátiyjesinde ókpeniń dawısti ótkeriw ózgesheligi asadı, perkussion dawıs anıq hám jaqsı, tap jaqınnan esitiledi. Kókirek kletkasında suyıqlıqlar toplansa (ekssudativ plevrit), dawıs júdá áste esitiledi yamasa ulıwma esitilmeydi.
Sonday etip, keselliklerdiń belgisine qarap ókpe hám plevra keselliklerin ajıratıwdıń ilájı bolmasa, plegafoniya usılların qollap, ókpe hám plevra kesellikleri ajıratıladı.
Torakocentez -kókirek kletkasınan suyıqlıq alıp tekseriw
Bul usıl kókirek kletkasında suyıqlıq toplanǵanda hám sol suyıqlıqtı alıp tekseriw zárúrligi tuwılǵanda qollanıladı.
Kókirek kletkasınan suyıqlıq alıw ushın iyne hám shpric isletiledi. Iyne hám shpricler qaynatıladı, iyne shanshılatuǵın orınnıń júni alınıp, aldın spirt-efir eritpesi, keyin yod eritpesi sủrtiledi. Iyne shanıshqanda iytler otırģan halatda, basqa haywanlar tik turģan halatda bolıwı kerek. Haywanlar fiksaciya qılıp, perkussiya usılı menen ótpes dawıs beretuǵın jay anıqlanadı. Iyneni suǵıwdan aldın teri eki tárepke tartıladı. Sonday qılǵanda, iyneni alǵannan keyin onıń tesigin teri jaqsı bekitedi. Iyne qaramalarda, qoy -eshkilerde hám shoshqalarda shep tárepinen 6-shı, oǹ tárepten 5-qabırǵalar arasından jiberiledi. Úlken qan tamırlar hám nerv tamırların jarahatlantırmaw ushın iyne qabırǵanıǹ tómengi aldınǵı ushı aldınan, kòkirektiń sırtqı venası joqarısınan shanshıladı. Iyne úlken haywanlarda 2-4 sm, kishkene haywanlarda 1-2 sm shuqırlıqta shanshıladı . Iyne shanshılıp , kókirek boslıǵına túskennen keyin, ondaǵı suyıqlıqtan shpricke alınadı. Iyne tartıp alınıp, jeri kolloidli eritpe menen sủrtiledi.
Alınǵan suyıqlıqtı teksergende onıń ózgesheligi, patogen mikroblar bar-joqlıǵı anıqlanadı. Ekssudat suyıqlıǵı qoyıw bolıp quramında 3, 5% ten joqarı belok saqlaydı hám asqınıw processleri ketkenliginen derek beredi. Ekssudat shókpesinde leykocitler, eritrocitler, endotelial kletkalar bolıwı múmkin. Irińli ekssudat kògimtir, bawırreń yamasa qara-qızıl reńde boladı. Mikroskop astında júdá kóp iriń denesheleri boladı. Shiriw procesi nátiyjesinde payda bolǵan ekssudattan sassıq, ólimtik iyisi keledi. Gemorragik ekssudat qızǵısh reńli bolıp, qan aǵıp atırǵanlıǵınan derek beredi. Ekssudatda tuberkulyoz tayaqshaları, streptokokklar h.b. mikroorganizimler bolıwı múmkin.
Transsudat tınıq, suwsıyaqlı bolıp, ash sarģımtır reńli, siltili reakciyalı bolıp, júdá kem muǵdarda belok saqlaydı. Mikroskop astında jalǵız -jalǵız eritrocit hám leykocitler kóriniwi múmkin. Transsudat júrek-qan tamır, bawır, búyrek keselliklerinde ushıraydı.
Sonday etip torakocentez usılı plevrit keselligin kókirek kletkasında suyıqlıq toplanıwınan parıqlawda qollanıladı. Ekssudat plevrit keselliginde ushırassa, transsudat kókirek boslıǵında suw toplanǵanda gúzetiledi.