Labora-toriya jumislari

Limfa túyinlerin tekseriw
Limfa túyinleri tiykarınan kóriw hám palpaciya usılları menen tekseriledi.
Qaramal, qoy hám eshkilerde jaq astı, kòkirek aldı, dize ústi hám jelin ústi limfa túyinleri tekseriledi. Keselliklerde limfa túyinleri úlkeyse qulaq aldı, tamaq arqasındaǵı, moyınnıń joqarı, orta hám tómengi túyinlerin de tekseriw múmkin.
Túyelerde jaq astı, tómengi jaq, kòkirek aldı, dize ústi hám shattıń júzeki limfa túyinleri tekseriledi. Semiz shoshqalarda teri astında júdá kóp may toplanǵanlıǵı sebepli limfa túyinlerin tekserip bolmaydı. Biraq keselliklerde tamaq arqasındaǵı limfa túyinlerin tekseriw múmkin. Arıq hám jas shoshqalarda jaq astı limfa túyinin tekserse boladı.
Atlarda jaq astı hám dize ústi limfa túyinleri tekseriledi. Keselliklerde limfa túyinleri úlkeyse qulaq aldı, moyınnıń orta hám tómengi, kòkirek aldı, bel, dumǵaza hám shat limfa túyinleri de ańsat ǵana tekseriliwi múmkin. Iyt hám pıshıqlarda tek shat limfa túyinleri, qusta moyınnıń tómengi bòlektegi kishkene - kishkene limfa túyinleri tekseriledi.
Limfa túyinlerin teksergende olardıń úlkenligi, forması, maydan ózgesheligi, konsistenciyası, jergilikli temperaturası, awrıw seziwi hám háreketleniwi anıqlanadı.
Saw haywanlardıń limfa túyinleri kóriw usılı menen teksergende bilinbeydi, úlkeymegen boladı, forması tegis yamasa domalaq, tıǵız, hàreketsheǹ, awrıwsız, maydanı tegis, jergilikli temperaturası ortasha boladı.
Keselliklerde limfa túyinleri úlkeyedi, isedi hám kórgende teriden bórtip shıģıp, anıq bilinedi. Egerde kesellik ayırım orınlarda bolsa, tek ǵana sol orındaǵı limfa túyini úlkeyip, basqaları normada boladı. Egerde kesellikke organizmniń hámme jerı qatnassa kópshilik yamasa hámme limfa túyinleri de úlkeyedi. Bul leykoz, qan parazitar h.b. keselliklerde gúzetiledi. Limfa túyinleri irińli asqınsa, olar úlkeygen hám domalaq boladı. Sıypalaǵanda bılqıldaydı, ıssı hám awrıwlı boladı.


3 - laboratoriyalıq jumıs. Murınnan aǵıp turǵan suyıqlıqtı tekseriw.