Korxonalar faoliyatini boshqarishning nazariy asoslari

Puxta o`ylangan qarorlar ilgari surilayotgan taxminlarga va ularni tekshirib ko`rishga diqqat bilan hamda tanqidiy yondoshuvchi rahbarlar tomonidan qabul qilinadi. Odatda ular qaror qabul qilishdan oldin ma’lum darajada shakllantirilgan aniq g`oyaga ega bo`ladilar.

Tasodifiy qarorlar mualliflari osonlik bilan son-sanoqsiz g`oyalarni o`ylab topishi mumkin, lekin ularni chuqur o`ylab, tahlil etib, aniqlashtirib va tekshirib o`tirmaydi. Shu tufayli bunday qarorlar yetarli asoslanmagan va unchalik ishonchli bo`lmaydi.

O`zi haqligiga to`liq ishonadigan rahbarlar g`oyalar va farazlarni chuqur tekshirib o`tirmay, tavakkal qarorlar qabul qilishga moyil bo`ladilar va yuzaga kelish mumkin bo`lgan xatarlardan qo`rqmaydilar.

Ayrim toifadagi rahbarlar mustaqil qaror qabul qilishga juda sustkashlik va ehtiyotkorlik bilan yondoshadilar. Ular vaziyatni obdan o`rganib, chuqur tahlil qilib, barcha variantlarni baholab so`ngra yakuniy qarorga kelishadi. Bunday qarorlar muaalliflari uchun g`oyani amalga oshirishdan ko`ra uni muvofiqlashtirib, nazorat ostiga olib turish ustun ahamiyat kasb etadi. Ko`p hollarda ortiqcha sustkashlik yoki ehtiyotkorlik natijasida qarorlar kechikib qabul qilinadi va rejalashtirilgan natijalarga erishish imkoniyalarini keskin pasaytiradi. Shuning uchun ularning boshqaruv qarorlarida ijodiy yondoshuv, tashabbuskorlik, tavakkalchilik elementlari va originallik yetishmaydi.

Boshqaruv qarorlarini turkumlash ularni tayyorlash, amalga oshirish va baholashga, o`ziga xos xususiyatlarini aniqlashga hamda qarorlarning sifati, samaradorligi va maqsadga muvofiqligini ta’minlashga xizmat qiladi.

Yuzaga kelish sabablariga ko`ra rejali, vaziyat ta‟sirida yuzaga kelgan, tashabbus bilan shakllantirilgan va ko`rsatma bo`yicha tayyorlangan qarorlar turlari uchraydi.