Касалликлари ва зараркунандаларига қарши

Уларга қарши курашиш учун саримсоқ экиладиган майдонлар ўсимлик қолдиқларидан яхшилаб тозаланади, ер чуқур қилиб хайдалади. Ўсимликнинг ўсиш даврида эса Децис (0,5 л/га), Суми-Альфа (0,2 л/га) ва Бульдог (0,4 л/га) кимёвий препаратларини 600 литр сувга қўшиб пуркалади.

• 
  Пиёз илдиз канасининг катталиги 0,7 – 1,1 мм бўлиб, уч-турт жуфт оёғи бўлади. Улар саримсоқпиёз экилган майдонларда ва омборхоналарда пиёз бошлари орасида қишлаб қолади. Каналар экин майдонларида пиёз бошлари ичига кириб, илдиз бўғинларини зарарлайди. Зарарланган пиёзбошлар чириб, истеъмол учун яроксиз бўлиб қолади. Каналар тухум қўйиш йули билан кўпайиб, ўз тухумларини пиёз бошлари ичига қўяди. Тухумлардан 5-7 кунда каналар чиқади ва яна пиёзларни зарарлай бошлайди. Пиёз канаси бир мавсумда 5-7 мартагача авлод беради.
  

Уларга қарши курашиш алмашлаб экишни, агротехникавий тадбирлар ўтказишни ўз ичига қамраб олади. Кимёвий препаратлардан Децис (0,5 л/га) ёки БИ-58 дан (1,5 л/га) ёки Карбофосдан 2 л/га пуркалиши тавсия этилади.

• 
  Сохта ун шудринг касаллиги ёки пероноспороз, энг кўп тарқалган замбуруғли касалликлардан бўлиб, уруғлик пиёз, саримсоқ ва сепма пиёзларни ўсув даврида зарарлайди. Бунда пиёз баргларида, уруғлик пиёз карнайларида оч кўкиш рангли думалоқ бахмалсимон доғлар пайдо бўлиб, бу доғлар кейинчалик катталашиб, тайёр озуқа моддалари хисобига яшаб, пиёз баргларининг ва уруғлик пиёз карнайларининг қуриб қолишига олиб келади. Натижада пиёз бошлари пишмай, пуч бўлиб қолади ёки уруғларнинг униб чиқиш қобилиятини пасайтиради. Пероноспора замбуруғлари ривожланиш даврида ипсимон конидиялар хосил қилиб, учида тухумсимон думалоқ шарчалар пайдо бўлади. Уларнинг ранги оч кул ранг ёки сиёх рангли бўлиб қолади. Бу пуфакли шарчалар намлик ёки ёғингарчилик ва иссиқликнинг ортиши билан тез тарқалиб кетади. Замбуруғларнинг кўпайиши учун 10-12 даражали харорат энг қулай шароит хисобланади. Замбуруғлар тупроқда ва ўсимлик қолдиқларида қишлаб қолади.