Жисмоний тарбия ва спорт вазирлиги ўзбекистон давлат жисмоний тарбия ва спорт университети артиқов зохиджон собирович

УЧИНЧИ БОБ БЎЙИЧА ХУЛОСАЛАР
Педагогик кузатув, суҳбат, сўровнома ва ўтказилган тадқиқот натижаларининг қиёсий таҳлилига асосан қуйидаги хулосаларни эътироф этиш мумкин:

1. 
   Педагогик кузатув ва сўровнома натижаларидан маълум бўлдики, белбоғли курашда қўлланиладиган техник-тактик усуллар ва улар ижросини таъминловчи жисмоний компонентларнинг рейтинг қийматига асосланиш, шу жумладан, статик ва айланма динамик кучланишлар таъсирида мувозанат сақлаш машқларидан фойдаланиш имкониятлари барча респондент-тренерлар фаолиятида бир хил педагогик принцип доирасида амалга оширилмас экан. Машғулотларда статик ва айланма динамик кучланиш ҳаракатлари давомида мувозанат сақлаш машқларини қўллашга жиддий эътибор берилмас экан.
   
2. 
   Жорий тадқиқот натижалари ва уларнинг қиёсий таҳлили шуни кўрсатдики, деярли барча жисмоний сифатлар бўйича қўлланилган тест машқлари қисқа муддатли бўлса-да, уларнинг пульсометрик қиймати юракни қисқариш ритмининг кескин тезлашганлиги билан ифодаланди. Бундай ҳолат тадқиқотда иштирок этган курашчиларда юрак фаолиятининг функционал реакцияси анаэроб йўналишли ва қисқа муддатли юкламаларга ҳам кескин қўзғалиш билан жавоб берганлигидан дарак беради. Юрак ритми ана шундай реакцияси 3 дақ. вақт ўтгандан кейин ҳам тикланмаганлиги ҳатто қисқа муддатли юкламаларни ўзлаштиришга етарли функционал заҳира мавжуд эмаслигини тасдиқлайди.
   
3. 
   Тадқиқотда иштирок этган курашчиларда ушбу спорт турида устувор аҳамиятга лойиқ бўлган эгилувчанлик кўрсаткичлари ҳам етарли шаклланмаганлиги маълум бўлди. Уларда қайд этилган дастлабки эгилувчанлик кўрсаткичлари 1 йиллик анъанавий машғулотлар таъсирида ҳам жадал ўзгармаганлиги қайд этилди.
   
4. 
   Белбоғли кураш усулларини қўллашда устувор аҳамият касб этувчи статик ва айланма динамик кучланиш ҳаракатлари давомида мувозанат сақлаш функцияси тадқиқот объекти бўлмиш курашчиларда ниҳоятда заиф ривожланганлиги аниқланди. Айниқса, “юксиз” ва “юкбилан” чап ҳамда ўнг томонларга айланиш таъсирида мувозанат сақлаш вақтининг ўта қисқа муддат давом этганлиги ушбу курашчиларда вестибулосоматик рецепторлар функцияси ўта суст шаклланганлигидан дарак беради.