Искусство — %мирим

ҚУТЛЫҚЛАЎЛАР, ТЕЛЕГРАММАЛАР
Мениң мийнетлеримди баҳалап ҳүкиметимиз маған бирнеше орденлер ҳәм Ҳүрмет грамоталарын берди. Бундай ғамқорлыққа мен шексиз миннетдарман. 1968-жылы СССР халық артисти деген ҳүрметли атақ берилгенде, жән-жақтан телеграммалар, хатлар келген еди. Солардың ири-баслылары мыналар:

* * *

СССР мәденият министрлиги Сизди халық артисткасы деген ҳүрметли атаққа миясар болыўыңыз ҳәм юбилейиңиз бенен қутлықлайды. Қәдирли Айымхан Шамуратовна, Сиз бул жоқары атаққа өзиңиздиң искусствоға болған муҳаббатыңыз нәтийжесинде жетисип отырсыз. Дениңиз саў болсын! Сахналық өмириңиз жемисли бола берсин!
СССР мәденият министриниң орынбасары ПОПОВ.

* * *
Өзбекистан театр жәмийетиниң хызметкерлери ҳәм республика искусство ғайраткерлери Сизди, қәдирли Айымхан Шамуратовна, туўылғаныңызға 50 жыл толыўы мүнәсибети менен шын жүректен қутлықлайды. Даңқлы юбилейиңизге сыйлық ретинде Сизге Москваға творчестволық командировка ушын жоллама берилди.

ХОЖАЕВ, КАРИЕВ, ЗАХИДОВ.

* * *

Қазақстан мәденият министрлигиниң жәмәәти СССР халық артисткасы деген жоқары атақ алыўыңыз ҳәм 50 жасқа шығыўыңыз мүнәсибети менен Сизге дослық жүректен қызғын қутлы болсын айтады. Творчестволық қуўанышларыңызға ортақпыз. Қарақалпақ искусствосының бахты ушын ҳармай-талмай хызмет ете бериўиңизге тилеклеспиз.
Қазақстан Мәденият министри И.ОМАРОВ.

* * *

Әдиўли Айымханым! Қуяшлы Қарақалпақстаннан өсип шыққан туңғыш СССР халық артисткасы болған Сизди баўырыма басып, маңлайыңнан сүйемен!
Сизиң ТАМАРАХАНыңыз.

* * *

Нөкис. Станиславкий атындағы музыкалық драма ҳәм комедия театры. Айымхан Шамуратоваға!
Сахналық искусствоның әжайып шебери болған Сизди Түркменстан искусствосының гүллән хызметкерлери атынан қызғын қутлықлайман. Даңқлы тойыңыз мүбәрек болсын! Ден саўлығыңыз беккем болғай!
Түркменстан мәденият министриниң орынбасары ҚУРБАНҚЫЛЫШЕВА.

* * *

Ардақлы Айымханым! «Саодат» журналының жәмәәти ҳәм өзимниң атымнан жоллаған қызғын қутлықлаўымызды қабыл етиңиз. Сиз 50 жасқа шыққан дәўириңизде өзиңиздиң талантыңыз бенен миллионлаған тамашагөйлердиң жүреклерин ийелеп алдыңыз. «Саодат»тың талапшаң оқыўшылары Сизге жайнаған бахыт, күшли ден саўлық, үлкен табыслар тилейди.