«ijtimoiy fanlar va jismoniy madaniyat» kafedrasi

Oldindan rejalashtirilgan ma’ruzalarda talabalar o‘qituvchining kamchiliklarini aniqlab boradi va ma’ruza oxirida muhokama qilinadi. Bunda talabalarda kasbiy mahoratni tahlil qilish malakalari shakllanib boradi. O‘qituvchi reja tuzayotganida ma’ruza matniga ma’lum miqdordagi kamchiliklarni kiritishi lozim. Ammo bu kamchiliklar ma’ruza o‘qish jarayonida yaqqol ko‘zga tashlanmasligi kerak. Bu kamchiliklarni topishga intilish talabalarning bilish faoliyatini faollashtirishga yordam beradi.

Matbuot-konferensiyali ma’ruzada o‘qituvchi ma’ruza mavzusini aytgandan keyin har bir talaba 2-3 daqiqa mobaynida o‘qituvchiga savollar yozib beradi, o‘qituvchi esa savollar mazmuni bo‘yicha ajratib berilgan savollar asosida ma’ruzani boshlaydi. Ma’ruza savollarga javob berish tariqasida emas, balki mavzu mazmunini ochishga qaratilib, unda talabalar bergan savollarga javoblar ham keltiriladi.

Shunday qilib, pedagogika fanini o‘qitish jarayonining samaradorligini oshirishda bir necha turdagi ma’ruzalardan foydalanish o‘quvchilarda bilimlarning mustahkam shakllanishiga olib keladi.

Ma’ruzalarning samaradorligi quyidagilarga asoslanadi:

— aniq mantiqli, qiziqarli, talabga mos keluvchi mazmun;

— o‘qitish metodlari va usullaridan adekvat holda foydalanish;

— o‘qitishning texnik vositalari va ko‘rgazmali qo‘llanmalardan foydalanish;

— pedagogik muloqotda bo‘lish malakasi;

— ma’ruzachining malakasi.

Shuningdek, o‘tkazilayotgan ma’ruzalar matni quyidagi talablarga javob berishi kerak:

— pedagogika fani bo‘yicha to‘liq tushuncha berish;

— bu fanning ahamiyatini ko‘rsata bilish (muhimligini, mo‘ljallangan savollar mazmuni);

— fanlararo bog‘lanishni o‘rnatish va kerakli tushunchalar majmuini ochib berish;

— talabalarda o‘z kasbiga bo‘lgan qiziqishini uyg‘otish va mustahkamlash.