Ii. Боб Фуқаро ва ишлаб чиқаришга мўлжалланган биноларнинг ёнғин хавфсизлиги

Н = 28 + Т

бу ерда Т- бинонинг энг баланд нуқтаси баландлиги (дастак ўрнатилган нуқта баландлиги)

Ташқи ва ички хўжалик – ичимлик ёки хўжалик – ёнғинга қарши водопровод тармоғида гидростатик босим истеъмолчи олдида 60 м дан ошмаслиги лозим.


13. Аҳоли маскани ва саноат корхоналарида бир вақтда бўлиши мумкин бўлган ҳисобий ёнғинлар сонини меъёрий ҳужжатлар асосида аниқлаш
/2; 4; 5/
ҚМҚ 2.04.02-97 талаблари асосида аҳоли масканида содир бўлиши мумкин бўлган ҳисобий ёнғинлар сони. Аҳоли сони, бинолар қаватлилиги, ободонлаштирилганлик даражаси ва ҳоказо.
Ёнғинни ўчириш учун ҳисобий сув сарфи бошқа мақсадлардаги энг кўп сув истеъмоли пайтида таъминланиши лозим. Бунда саноат корхоналаридаги ҳудудларга сув сепишда, полларни ювиш, душ қабул қилиш, технологик ускуналарни ювиш учун керак бўладиган сув сарфлари инобатга олинмайди.
Аҳоли масканларида бир вақтнинг ўзида содир бўлиши мумкин бўлган ёнғинлар сони аҳоли масканида истиқомат қилаётган аҳоли сони ва бинолар қаватлилигига боғлиқ ҳолда ҚМҚ 2.04.02- 97 нинг 6-жадвалидан олинади.
Зонали сув таъминотида ташқи ёнғинни ўчириш учун ҳисобий сув сарфи ҳар бир зона учун ундаги аҳоли сонига қараб алоҳида аниқланади. Бир вақтда бўлиши мумкин бўлган ҳисобий ёнғинлар сони эса 6 - жадвалдан аҳолининг умумий сонига қараб аниқланади. Бунда аҳоли маскани ҳудудида саноат корхонаси жойлашган бўлса, бир вақтда содир бўлиши мумкин бўлган ҳисобий ёнғинлар сонига ундаги ёнғин ҳам қўшилади, ҳисобий сув сарфига эса ундаги талаб қилинган сув сарфи ҳам қўшилиши лозим, аммо булар 6 - жадвалдаги сув сарфидан кам бўлмаслиги лозим.
Бир неча аҳоли масканларига хизмат кўрсатаётган қишлоқ хўжалиги гуруҳли сув таъминоти тармоғи учун бир вақтда содир бўлиши мумкин бўлган ҳисобий ёнғинлар сони 6 – жадвалдан барча аҳоли масканларида истиқомат қилувчи яшовчилар сонига қараб олинади. Ташқи ёнғинни ўчириш учун талаб қилинадиган ҳисобий сув сарфи ҳар бир аҳоли маскани учун алоҳида аниқланади.
Аҳолиси 2 миллиондан ортиқ шаҳарларда ҳамда баландлиги ва ҳажми 6–жадвалда кўрсатилган қийматлардан катта бўлган биноларда бир вақтни ўзида бўлиши мумкин бўлган ҳисобий ёнғинлар сони ва битта ёнғинни ўчириш учун талаб қилинадиган ҳисобий сув сарфи ҳар бир конкрет ҳол учун давлат ёнғин назорати билан келишган ҳолда аниқланади.
Саноат корхоналари ёки қишлоқ хўжалиги ишлаб чиқариш мажмуаларида гидрантлар орқали ташқи ёнғинни бартараф этиш учун талаб қилинган ҳисобий сув сарфи ишлаб чиқаришнинг ёнғин хавфсизлиги тоифасига, бинонинг ўтга чидамлилик даражасига, ҳажмига ва конструктив ўзига хослигига қараб ҚМҚ 2.04.02 – 97 (8, 9 - жадваллар) дан аниқланади.
Юқоридаги 8, 9 - жадвалларда келтирилган сув сарфлари битта ёнғинни ўчириш учун талаб қилинган қийматлари бўлиб, бир вақтни ўзида бўлиши мумкин бўлган ҳисобий ёнғинлар сони корхона майдони юзасига боғлиқ ҳолда ҚМҚ 2.04.02 – 97 нинг 2.22 бандига асосан олинади: 150 га гача битта ёнғин; 150 га дан ортиқ бўлганда – иккита.
Саноат корхонаси сув ўтказгич тармоқлари шаҳар сув таъминоти тармоқлари билан бирлашган бўлса, ёнғинни ўчириш учун ҳисобий сув сарфи саноат корхонаси эгаллаган ҳудуд юзасига ва аҳоли сонига қараб ҚМҚ 2.04.02 – 97 нинг 2.23 бандига асосан олинади:

• 
  Агар саноат корхонаси майдони 150 гектаргача ва шаҳардаги аҳоли сони 10 минггача бўлса, битта ёнғин олинади (аҳоли маскани ёки саноат корхонаси учун керак бўладиган энг катта сув сарфи олинади);
  
• 
  Агар саноат корхонаси майдони 150 гектаргача ва шаҳардаги аҳоли сони 10 мингдан 25 минггача бўлса, иккита ёнғин олинади (битта аҳоли масканида ва битта саноат корхонасида олинади);
  
• 
  Агар саноат корхонаси майдони 150 гектар ва ундан катта ҳамда шаҳардаги аҳоли сони 25 минггача бўлса, иккита ёнғин олинади (иккита аҳоли масканида ёки иккита саноат корхонасида энг кўп сув сарфи бўйича);
  
• 
  Агар саноат корхонаси майдони 150 га ва ундан катта ҳамда шаҳардаги аҳоли сони 25 мингдан кўп бўлса, содир бўлиши мумкин бўлган ёнғинлар сони саноат корхонаси учун алоҳида, аҳоли маскани учун алоҳида олинади, умумий ҳисобий сув сарфи каттасини (саноат корхонасида ёки аҳоли масканида) 100% и, кичигини (саноат корхонасида ёки аҳоли масканида) эса 50%и олиниб, улар йиғиндиси қаралади.