I-чет эл валютаси бўйича биржа савдоларига оид саволлар

5. “Ўзбекистон республика валюта биржаси”га аъзо бўлиш тартиби қандай?

“Ўзбекистон республика валюта биржаси” акциядорлик жамиятига аъзолик тўғрисидаги Низом”нинг 9-11-бандларига мувофиқ ариза берувчи Биржа аъзолари таркибига кириш учун Кузатув кенгаши раисининг номига Биржа аъзолари таркибига қабул қилиш ҳақида, аниқ тоифасини кўрсатган ҳолда, ариза топширади.

Аризага қуйидаги ҳужжатлар илова қилинади:

• 
  Устав (Низом) нинг нотариал тасдиқланган нусхаси;
  
• 
  молиявий йил учун бухгалтерлик баланси ва молиявий натижалар тўғрисидаги ҳисобот (янги ташкил қилинганлар - охирги чорак натижаларига кўра ҳисобот);
  
• 
  молиявий ҳисобот йили якунлари бўйича аудиторлик ташкилотининг хулосаси;
  
• 
  Биржа аъзолари таркибига қабул қилинган ҳолда аъзолик бадалини тўлаш ҳақида кафолат хати;
  
• 
  қайдлов варақчаси;
  
• 
  нотариал тасдиқланган биринчи ва иккинчи имзо қўйиш ҳуқуқидан фойдаланувчи мансабдор шахсларнинг имзо намуналари ва муҳри туширилган варақча;
  
• 
  Трейдерларнинг рўйхати;
  
• 
  Савдо тизимида операцияларни амалга ошириш учун ишончнома;
  
• 
  шахсий ҳисобварақлар бўйича кўчирмалар олиш учун ишончнома;
  
• 
  Биржа савдолари бўйича ҳисоб-китобларни амалга ошириш учун махсус ҳисобварақалар рўйхати.
  

“А” тоифаси бўйича Биржа аъзолари таркибига кириш учун қўшимча равишда, Марказий банк томонидан берилган чет эл валютасида операцияларни ўтказиш учун лицензиянинг нотариал тасдиқланган нусхаси тақдим қилиниши керак.


6. Ўзбекистон Республикаси “Валютани тартибга солиш тўғрисида”ги Қонунининг мақсади нима?

Ўзбекистон Республикаси “Валютани тартибга солиш тўғрисида”ги Қонунининг 1-моддасига мувофиқ ушбу Қонуннинг мақсади Ўзбекистон Республикаси ҳудудида валюта операцияларини амалга ошириш соҳасидаги муносабатларни тартибга солишдан иборат.

7. “Валюта бойликлари”, “чет эл валютаси” тушунчаларига изоҳ беринг.

Ўзбекистон Республикаси “Валютани тартибга солиш тўғрисида”ги Қонунининг 3-моддасига мувофиқ чет эл валютаси, чет эл валютасидаги қимматли қоғозлар, чет эл валютасидаги тўлов ҳужжатлари ва соф қуйма олтин валюта бойликлари ҳисобланади.

Чет эл валютаси - муомалада бўлган ҳамда хорижий давлатда қонуний тўлов воситаси ҳисобланган банкнотлар, хазина билетлари ва тангалар кўринишидаги чет эл пул белгилари, муомаладан чиқарилган ёки чиқарилаётган ҳамда худди шу хорижий давлатнинг пул белгиларига алмаштирилиши лозим бўлган чет эл пул белгилари, шунингдек ҳисобварақларда ва омонатларда бўлган хорижий давлатларнинг пул бирликларидаги ҳамда халқаро пул ёки ҳисоб-китоб бирликларидаги маблағлардир.