I-чет эл валютаси бўйича биржа савдоларига оид саволлар

11. Биржадан ташқари валюта бозорида операциялар ўтказиш учун ваколатли банклар томонидан очиладиган махсус валюта ҳисоб рақамлари ҳақида гапириб беринг.

“Биржадан ташқари валюта бозорида хорижий валютани харид қилиш ва сотиш операцияларини ўтказиш тартиби тўғрисида”ги низомнинг 27-бандига мувофиқ биржадан ташқари валюта бозорида операциялар ўтказиш учун ваколатли банклар ўз мижозларига махсус валюта ҳисоб рақамлари очадилар, ушбу ҳисоб рақамларига валюта бозорида сотиб олинган хорижий валюта ўтказилади. Махсус валюта ҳисоб рақами очмасдан банк мижози томонидан хорижий валюта харид қилинишига йўл қўйилмайди.

Махсус валюта ҳисоб рақамига шунингдек мазкур ҳисоб рақамидан илгари чиқарилган ва фойдаланилмаган ёки қайтарилган валюта ҳам ўтказилади.
Махсус валюта ҳисоб рақамидаги маблағлардан қатъий равишда мижознинг буюртманомасида назарда тутилган хорижий валютани харид қилиш мақсадларида фойдаланилади.
Қуйидагиларга йўл қўйилмайди:
махсус ҳисоб рақамидан нақд валютани олиш, хизмат сафари харажатлари тўлаш учун олиш бундан мустасно;
махсус валюта ҳисоб рақамидан хорижий валютани хўжалик юритувчи субъектларнинг бошқа валюта ҳисоб рақамларига ўтказиш, шунингдек маблағларни депозитга жойлаштириш ва ҳисоб рақамлари қолдиғига фоизлар ҳисоблаш.


12. Кимлар банклараро валюта бозори қатнашчилари ҳисобланади?

“Биржадан ташқари валюта бозорида хорижий валютани харид қилиш ва сотиш операцияларини ўтказиш тартиби тўғрисида”ги низомнинг 8 ва 9-бандларига мувофиқ Ўзбекистон Республикасининг ваколатли банклари ва Марказий банк банклараро валюта бозори қатнашчилари ҳисобланади.

Марказий банк банклараро савдо сессияларида фақат Бирлашган барқарорлаштириш жамғармаси маблағлари билан қатнашади.
Ваколатли банкларнинг мижозлари банклараро валюта бозори битишувларида фақат ўзлари мижози ҳисобланган ваколатли банклар орқали қатнашиши мумкин. Ушбу ҳолда ваколатли банк бозорда мижознинг топшириғига кўра ўз номидан иш кўради.