I-чет эл валютаси бўйича биржа савдоларига оид саволлар

27. Дилернинг режа позицияси нима?

“Ўзбекистон республика валюта биржасида банклараро савдо сессияларини ўтказиш қоидалари”га мувофиқ Дилернинг режа позицияси - Дилернинг Савдо тизимидаги буюртмаларига биноан, бирор-бир инструментни, савдоларнинг айни бир вақтида сотиш ва сотиб олиш имкониятларини ҳисоблаш натижасида ҳосил бўлиши мумкин бўлган мажбурият ва талаблари бўйича вужудга келадиган ҳолатини ифодалайди.

28. Ўзбекистон республика валюта биржасида валютавий своп операциялари қандай меъёрий ҳужжатлар асосида амалга оширилади?

Ўзбекистон республика валюта биржасида валютавий своп операциялари, “ЎзРВБда валютавий своп операцияларини ўтказиш қоидалари” нинг 1.2.-бандига мувофиқ ЎзРВБ Устави, “ЎзРВБда валютавий своп операцияларини ўтказиш қоидалари” ва Ўзбекистон Республикасининг валюта операцияларини ўтказишни мувофиқлаштирувчи қонун ҳужжатлари асосида амалга оширилади.

29. Валютавий своп операцияси нима?

“Ўзбекистон республика валюта биржасида валютавий своп операцияларини ўтказиш қоидалари”га мувофиқ валютавий своп операцияси - битимда белгиланган муддат ва валюта курси бўйича ҳисоблашиш (қайта алмашув) шарти асосида валюталарни бир вақтда сотиб олиш ва сотиш (алмашув) бўйича икки томонлама битимдир. Валютавий своп операциялари икки қисмдан иборат бўлиб, биринчи қисмини амалга оширишда валюталарнинг дастлабки алмашинуви (спот битим), иккинчи қисмини бажаришда эса, қайта алмашинуви (форвард-битими) ва своп шартномасининг ёпилиши содир бўлади.

30. Савдо тизимида валютавий своп операциялари кимлар ўртасида амалга оширилади?

“ЎзРВБда валютавий своп операцияларини ўтказиш қоидалари” нинг 1.21 бандига мувофиқ савдо тизимида валютавий своп операциялари:

- Марказий банк ва ваколатли банклар ўртасида;
- ваколатли банклар ўртасида амалга оширилади.


31. Валютавий своп операцияларини амалга оширишда чет эл валютаси сифатида қайси валюталардан фойдаланилади?

“ЎзРВБда валютавий своп операцияларини ўтказиш қоидалари” нинг 1.22 бандига мувофиқ дилерлар томонидан валютавий своп операцияларини амалга оширишда чет эл валютаси сифатида АҚШ доллари ва евродан ҳамда ЎзРВБнинг Кузатув кенгаши қарорига кўра бошқа валюталардан фойдаланилиши мумкин.