I bob. Yengil sanoat mahsulotlari ishlab chiqarish va uning mintaqaviy muammolari

Mavzuning o’rganilganlik darajasi. Ishlab chiqarishni hududiy tashkil etish, xususan, sanoat tarmoqlarini rivojlantirish va joylashtirishning nazariy masalalari xorij va O’zbekiston olimlari tomonidan o’rganilgan va ma‘lum ma‘noda amaliyotga tadbiq etilgan. Bu borada Yevropa mamlakatlarida (Germaniya, Fransiya, Shvetsiya) yaratilgan shtandort va geoiqtisodiy nazariyalar, sobiq Ittifoqda maydonga tashlangan hududiy ishlab chiqarish majmualari va energiya ishlab chiqarish sikllari, mintaqalarda vujudga kelgan rayonlarni kompleks rivojlantirish masalalari kabilar diqqatga sazovordir. Ushbu muammolar bilan MDH mamlakatlarida N.N. Kolosovskiy, A.E. Probst, YU.G. Saushkin, A.E. Afanasevskiy, I.M. Maergoyz, V.V. Kistanov, L.I. Gramoteeva, L.V. Kozlovskaya, A.T. Xrushev, K.O. Otarboev, R.K. Raximov va boshqa olimlar shug’ullanishgan. O’zbekistonda esa yengil sanoat tarmoqlarini joylashtirish va rivojlantirish masalalari M.A. Abdusalomov, Z.M. Akramov, T.M. Ahmedov, E.A. Ahmedov, K.N. Bedrinsev, R.YA. Documov, SH.B. Imomov, S.K. Ziyodullaev,
SH.N. Zokirov, A.N. Ro’ziev, A.S Soliev, N.S. Sultonov, N. To’xliev, A.A. Qayumov, D.Ro’zmetov va boshqalar tomonidan tadqiq etilgan. Bevosita to’qimachilik sanoatining iqtisodiy masalalari I.I.Iskanderov va A.T. Yusupovlarning ilmiy ishlarida batafsil yoritilgan. Ammo, ushbu ishlarning ko’pchiligi respublika sanoatining rivojlanishi va joylanishini umumiy masalalariga bag’ishlangan. Hozirgi sharoit esa mazkur muammoni respublikamiz mustaqilligi va uning iqtisodiyotini bozor mexanizmini amalga oshirish nuqtai nazaridan tahlil va tadqiq qilishni talab etadi. Yana shuni alohida ta‘kidlash joizki, iqtisodiy va ijtimoiy geografiya fanining tarkibiy qismi bo’lgan sanoat geografiyasiga oid tadqiqotlar soni ko’p emas (L. Erdonov, 1996; A. Haydarov, 1992; L. Qarshiboeva, 2000; H. Mirzaahmedov, 2003; H. Abdunazarov, 2005). Biroq, ularning aksariyatida sanoat tugunlari yoki ayrim hududlar (viloyatlar) sanoat majmuasi o’rganilgan, alohida sanoat tarmog’i esa dissertatsiya mavzusi sifatida tadqiq etilmagan. Vaholanki, iqtisodiy va ijtimoiy geografiyada turli rayonlarni o’rganish bilan birga alohida tarmoqlarni ham tadqiq etish katta ilmiy va amaliy ahamiyat kasb etadi.