|
Xotira chirog„i o„chmaydi
Assalomu alaykum, aziz vatandoshlar!
Qadrli urush va mehnat faxriylari!
Bugun o„lkamizda ilk bor Xotira va Qadrlash kuni nishonlanmoqda.
Men barchangizni – jafokash, mehnatkash, ko„pni ko„rgan, katta-kichik janglarda
mardlik va jasorat ko„rsatgan xalqimizni mana shu qutlug„ sana bilan chin qalbimdan
tabriklayman.
Biz nima uchun 9 may bayramini Xotira va Qadrlash kuni, deb e‟lon qildik.
Ijozatingiz bilan shu to„g„rida yana ikki og„iz aytib o„tsam.
Xotira deganda biz bu foniy dunyodan o„tgan ajdodlarimizni eslash, ularning
chirog„ini yoqib, ezgu ishlarini davom ettirishni tushunamiz. Bu xalqimizga xos
azaliy fazilatdir.
Xotirasi bo„lmagan, tarixini unutgan, o„z ajdodlarining qadriga yetmaydigan
millatning istiqboli yo„q. Bu haqiqatni kishilik tarixi isbotlab turibdi.
479
Qadrlash degani – bu asrlar davomida ona diyorimizni, xalqimizning ozodlik va
istiqlolini, erkin va farovon hayotini mardlik va shijoat bilan himoya qilgan fidoyi
vatandoshlarimizni yodga olmoq, ularga munosib hurmat va ehtirom ko„rsatmoqdir.
Hayotning ko„p-ko„p sinovlarini, azob-uqubatlarini boshidan kechirgan, Vatan
uchun, el-yurt uchun, mana shu sof osmonimiz uchun jon olib jon bergan, bugun ham
saflarimizda yurgan mehribon ota-bobolarimizni, olijanob insonlarni e‟zozlashdir.
Xotira va Qadrlash kuni degan tushuncha g„oyat teran ma‟noga ega. Bu faqat
fashizm balosiga qarshi jang-u jadallarda qatnashgan, ona-yurt himoyasi uchun umrini
baxsh etgan kishilarni sharaflash degani emas.
Bu muborak kunda, xalqimizning asrlar davomida orzu-niyat qilib, intilib kelgani –
hurriyat va ozodlik yo„lida hayotini qurbon qilib shahid ketgan To„maris, Shiroq,
Spitamen, Jaloliddin Manguberdi, Najmiddin Kubro, Namoz botir kabi xalq
qahramonlarini, Qodiriy, Behbudiy, Munavvarqori, Cho„lpon, Avloniy, Fitrat, Usmon
Nosir singari millatimiz fidoyilarini eslashimiz ham qarz, ham farzdir.
Xotira va qadrlash deganda biz, avvalo, o„zimizni inson sifatida anglashni,
odamiylik fazilatlarimizni ulug„lashni nazarda tutamiz. Eng muhimi, bu hayajonli va
iztirobli sana o„rnimizga keladigan yosh avlodni mana shu ruhda tarbiyalashga, ular
qalbida Vatan va yurt uchun g„urur va iftixor tuyg„ularini uyg„otishga xizmat qiladi.
Bu hayotning go„zal va nurafshon, yurtimizning ozod va obod bo„lishida shu
muqaddas zaminda yashayotgan qo„li qadoq, niyati pok million-million
yurtdoshlarimizning beqiyos hissasi bor. Bugungi Xotira va Qadrlash kunida men
ko„pchilik qatorida ana shu kamtar va kamsuqum, oddiy, zahmatkash insonlarni
bag„rimga olib, barchasiga ta‟zim qilaman.
Muhtaram do„stlar, yurtdoshlarim!
Bugun poytaxtimiz markazida bunyod etilgan muazzam Xotira maydoni
ochilmoqda. Bu ham mustaqillik tafakkurining yana bir bor namoyon bo„lishi,
xalqimizning tabiatiga yot bo„lgan eski qolip va soxta g„oyalardan voz
kechganimizning yana bir tasdig„idir.
Shu nuqtayi nazardan qaraganda «noma‟lum askar» degan tushuncha nimani
anglatar edi?
O„zingiz o„ylang, inson ona yurti, xalqining baxt-saodati uchun omonsiz janglarda
jonini fido etsa-yu uning nomi noma‟lum bo„lsa!
Axir, urushga ketgan har bir askarning nomi, nasl-nasabi uning ota-onasi,
qarindosh-urug„lari, farzandlarining qalbida bir umr armon bo„lib yashaydi-ku! Axir,
ularning har biri shu xalqimiz, shu millatimizning jondan aziz farzandlari, bizning
jigarbandlarimiz emasmi?!
Biz uchun urushlarda qurbon bo„lgan yuz minglab yurtdoshlarimizning nomi ham,
jasorati ham ma‟lum va hech qachon unutilmagay, inshoollo!
Shuning uchun biz ularning nomlarini mana shu maydondagi muhtasham Xotira
kitobiga zarhal harflar bilan mangu muhrlab qo„ydik.
480
Toki bu muqaddas ziyoratgohga qadam qo„ygan har bir inson, nafaqat xalqimiz,
balki butun dunyo ahli ajdodlarimizga, fidoyi jangchilarimizga bo„lgan buyuk
ehtiromimizni ko„rsin, ularning xotirasi qarshisida ta‟zim bajo etsin.
Aziz birodarlar!
Mana shu maydon markazida urush va ayriliqlardan behad qayg„u-jafo chekkan,
farzandlari dog„ida qaddi dol bo„lgan Motamsaro ona haykali o„rnatilgan.
Bu haykal uzoq tarixi davomida ne-ne balo-qazolarni, jabr-u zulmlarni, qirg„in-
qatag„onlarni boshidan kechirgan, ayni paytda o„z erkinligi, insoniy haq-huquqlari
uchun tinimsiz kurashgan ona-Vatanimizning yorqin timsolidir.
Inson bolasini Ona yorug„ dunyoga keltiradi, oq yuvib oq taraydi. Uni beg„araz
mehri bilan ulg„aytiradi. Inson qalbida neki olijanob tuyg„ular va odamiylik
xususiyatlari mavjud bo„lsa, barchasi ona mehridan, ona tarbiyasidandir.
Vatanga muhabbat tuyg„usi ona suti, ona allasi bilan qon-qonimizga singadi,
ongimizga kiradi.
Shu bois Ona – Vatan, Vatan – Ona, demakdir. Biz mehr va muhabbatni, sadoqat
va fidoyilikni munis onalarimizdan, bebaho Vatanimizdan olamiz. Va bizning ham
jamiki ezgu niyatlarimiz, xayrli ishlarimiz Ona-Vatanga atalgandir.
Motamsaro onaning mahzun qiyofasi har birimizni hushyorlikka chorlaydi. Urush
va qirg„inlarga yo„l qo„ymaslikka, bugungi yorug„ va dorilomon kunlarimizning
qadriga yetib yashashga da‟vat etadi.
Biz muqaddas Ona haykali poyiga bitilgan «Sen doimo qalbimdasan, jigarim»
so„zlari millatimizning, xalqimizning qurbon bo„lgan farzandlariga cheksiz ehtiromini
anglatib, qalblarimizda doimo aks sado berib turadi.
Mangu olov tegrasiga zikr etilgan «El-yurtimizning erki va ozodligi, baxt-u saodati
uchun hayotini qurbon qilgan vatandoshlarimiz xotirasi hamisha barhayotdir», degan
so„zlar esa uzoq va yaqin tariximizda bugungi ozodlik va mustaqilligimiz uchun
kurashib jon fido etganlar xotirasi yuraklarimizda abadiy yashashini anglatadi.
Aziz vatandoshlar!
Biz mustaqillik yillarida o„zligimizni anglash, tarixiy-milliy qadriyatlarimizni
tiklash borasida nimaiki ish qilayotgan bo„lsak, ularning barchasini yagona maqsad-
ko„pmillatli xalqimizni birlashtirish uchun qilmoqdamiz.
Ishonchim komilki, Xotira va qadrlash kuni xalqimizni yanada birlashtiradi, uning
ruhiga malham bo„ladi, irodasini baquvvat, iymonini butun qiladi.
Fursatdan foydalanib, mana shu muazzam obidani bunyod etishda sidqidildan
mehnat qilgan quruvchi va ustalarga, me‟mor-u muhandislarga o„z nomimdan, butun
xalqimiz nomidan samimiy minnatdorchilik bildirishga ijozat etgaysizlar.
Shunday xayrli va olijanob ishga hissam qo„shilganidan men ham g„oyat
baxtiyorman.
Aziz yurtdoshlarim!
Barchangizni bugungi ulug„ ayyom bilan yana bir bor tabriklayman.
Hammangizga uzoq umr, sihat-salomatlik, farzandlarimiz baxtini ko„rish nasib
etsin.
481
Xotira va Qadrlash kuniga
bag‘ishlangan tantanali
marosimdagi so‘z,
1999-yil 9-may
Do'stlaringiz bilan baham: | 
