Procesverbal

Fatmir Xhafaj - Faleminderit!

Dhe ne për pyetje jemi. Kush ka pyetje?

Fatmir Xhafaj – Po, zoti Bylykbashi.

Oerd Bylykbashi – Po i përmbledh unë pyetjet në emër të opozitës.

Zonja Luzi, ju keni mbuluar këtë funksion kaq të rëndësishëm dhe përtej asaj se çfarë do të ndodhë në të ardhmen, ajo që ne na duhet të gjykojmë në rastin tuaj dhe të një kandidati tjetër është edhe performanca e KQZ-së. Kështu bëhemi më të qartë. Dokument më të mirë se sa raportet e OSBE-ODIHR-it, por dhe pastaj shumë fakte publike që njihen, nuk ka. Raporti i OSBE-ODIHR-it konstaton një rënie të standardit të zgjedhjeve nga viti 2013 deri në vitin 2015 duke listuar për herë të parë pas shumë vjetësh 3 standarde të shkelura. Njëri prej tyre është pabarazia për të kandiduar e kandidatëve dhe i jep në mënyrë specifike me çregjistrimin e kandidatëve të PSD-së nga KQZ-ja pa i dhënë mundësinë që të korrigjojnë firmat që gjykoheshin të falsifikuara. Ligji parashikon mundësinë e korrigjimit të gabimeve, ndërkohë vepra penale ka rrugë tjetër. E për rrjedhojë mbi bazën e standardeve kandidati nuk mund të penalizohet për këtë. Këtë shkelje të KQZ-së, është një votim 4 me 3 dje ai e ka kondensuar në shkelje të një standardi bazë që është e drejta për të kandiduar në mënyrë të lirshme. Po kështu sipas ODIHR-it kësaj i bashkohet dhe një qëndrim inkonsistent ku një numër kandidatësh është pranuar dorëheqja dhe për kandidatë të tjerë. Dorëheqja për rrjedhojë zëvendësimi nuk është pranuar. Partia Demokratike në pamundësi për të konkurruar në Kurbin, sepse mbeti e pamundur që të vendoste kandidatë pas përpjekjeve për ta çuar në atë që ishte procesi i dekriminalizimit, në një fazë ku ende nuk kishte ligj. Çfarë mund të na thoni në lidhje me këtë qëndrim me votë 4 me 3 të KQZ-së, sepse kemi të bëjmë me një shkelje standardi të zgjedhjeve në Shqipëri sipas raportit të OSBE-ODIHR-it.

Lefterije Lleshi (Luzi) - Faleminderit!

Unë sot këtu jam për të dhënë qëndrimin tim në lidhje me pyetjen tuaj dhe nuk mund të jap një qëndrim të votimit në tërësi të komisionit 4 me 3. Sikurse ju e dini, çdo votim brenda komisionit është personal dhe i justifikuar nga secili që jep votën për të.

Në lidhje me pyetjen në tërësi unë nuk do t’i hyj vendimmarrjes. Jo çdo vendim 4 me 3 është një vendim i cili gjykohet nga jashtë, sepse secili e argumenton vetë nëse është në zbatueshmëri të ligjit apo jo. Për sa kohë ligji apo Kodi Zgjedhor ka parashikuar që dhe votime të tilla të merren si 4 me 3, 5 me 2, 7 me 0 do të thotë që vendimin nuk mund ta konsiderosh të kontestueshëm vetëm pse pikërisht u mor 4 me 3. E para.

E dyta, nuk është i vetmi vendim i cili është marrë 4 me 3. Ne aty debatojmë shumë me njëri-tjetrin. Pikërisht janë këto vendime dhe të tjera të cilat janë shtruar dhe në analizën e punës së KQZ-së për ta ndryshuar dhe për të qenë qasje e KQZ-së në ndryshimin e ardhshëm që do t’i bëhet Kodit Zgjedhor, që do të thotë se të gjitha ato nene për të cilat ne debatojmë pa fund, në fakt ne nuk duhet të debatojmë, duhet të respektojmë kodin, duhet të rishikohen nga ana juaj. Këto pika të cilat ju përmendët ne i kemi paraqitur si pika për të ndryshuar ligjin në të ardhmen. Pra, ne të zbatojmë kodin dhe jo të bëjmë interpretime në të. Fakti i një kodi sot që na lë ne të interpretojmë, unë thashë nuk është vetëm kjo, por ka dhe shumë elementë të tjerë për të cilat ne debatojmë brenda komisionit, sepse ligji nuk është shumë i qartë. Ai sjell dhe raste të tilla të cilat mund të jenë siç thatë ju, por dhe mund të mos jenë. Vendimmarrja jonë gjithsesi është një vendimmarrje e cila në rast se ka paqartësi dhe problematika i drejtohet edhe Kolegjit Zgjedhor.

Fatmir Xhafaj - Faleminderit!

Po, zoti Bylykbashi.

Oerd Bylykbashi – Në fakt unë iu referova asaj që është, jo që mund të mos jetë, sepse këtë e thotë ODIHR-i, që kemi një shkelje të standardit. Në rastin konkret kandidatët e PSD-së cenonin balancën numerike të rezultatit në zona të caktuara. Këta u hoqën, kërkohej nga një subjekt kundërshtar u hoqën dhe KQZ-ja mori një vendim që ODIHR-i na e ka shkruar në ballë si shkelje të standardit.

Lefterije Lleshi (Luzi) – Kjo është një analizë që e bëni ju.

Oerd Bylykbashi – Jo. Unë po them çfarë thotë ODIHR-i këtu.

Kemi dhe një çështje tjetër. KQZ-ja ka për detyrë të ndërhyjë dhe të investigojë kryesisht situata të rënda, të paktën në dukje, për të ndarë nëse procesi zgjedhor është cenuar apo jo. Për rrjedhojë shpall pavlefshmëri ose të nxjerrë rezultate. E ka bërë në të shkuarën me një numër rastesh si në Lezhë, Shkodër, Tiranë. Ka ndërhyrë në mënyrë energjike për të sjellë në parametra normalë procesin. OSBE-ODIHR-i përsëri kritikon KQZ-në për inaktivitet, për mosndërhyrje nëpërmjet aktesh të cilat do të plotësonin hapësirat që ligji ia lë KQZ-së. Kemi rastin e importimit të zgjedhësve në bashkitë e Durrësit dhe të Kavajës në vitin 2015. Problemi u bë publik herët, madje subjektet shkonin deri në kërcënim për moslejim të zgjedhësve ditën e votimit. Por KQZ-ja në rekordin tonë nuk ka ndërhyrë, nuk na rezulton që të ketë ndërhyrë për ta rregulluar këtë aspekt. Ju jeni gardianët. Se çfarë ndodh me aspekte penale, kjo është histori tjetër. Ju keni bërë ndoshta dhe kallëzim.

Lefterije Lleshi (Luzi) – Po kam bërë dhe kallëzim.

Oerd Bylykbashi – Po ai del pas 2 vjetësh. Ndoshta kur del fajtori, nuk bën diferencë te rezultati. KQZ-ja ndërhyn për të zgjidhur çështjen deri ditën e votimit. Në këtë rast rezulton që KQZ-ja nuk ka ndërhyrë, ndërsa në mënyrë aktive ka ndërhyrë dhe OSBE-ODIHR-i. Pra, e konstaton si një veprim në kundërshtim me rregullin ligjor edhe pse i kishte përfunduar afati për listën përfundimtare. Përfshirë dhe qendrat e votimit nëpër burgje me një kërkesë të qeverisë është ndryshuar ajo që kodi e ndalon. Këtë e ka kërkuar edhe opozita para vitit 2013, që mbas afatit 2-3 ditor, në mos gaboj, nuk ndryshon lista. KQZ-ja ka marrë vendim për të marrë fletë votimi për t’i dërguar në burgje për të lejuar të burgosurit të votojnë. Dështimi për mosregjistrim ishte i tjetërkujt, por ju kishit një ndalim ligjor që këta të votonin. KQZ-ja ka marrë një votim 4 me 3 shumë të debatuar dhe në komision, ndryshe nga ai rasti tjetër për të lejuar me ndikim në rezultat në fund fare dhe eventualisht. Si e shpjegoni ju këtë lloj inkonsistence vendimmarrëse me votë 4 me 3?

Lefterije Lleshi (Luzi) – Më duhet të shpjegoj vendimin themelor...

Oerd Bylykbashi - T’jua them dhe arsyen pse e bëj pyetjen. Ne do të detyrohemi të ndërhyjmë për ta rregulluar në ligj këtë aspekt që KQZ-ja diku vepron kështu, diku vepron ndryshe. Pra, të jetë gjithmonë njësoj. Ose të veprojë, ose të mos veprojë, ashtu siç u bë në rastin e komisionerëve që ikin me gjithë vulë dhe KQZ-ja në mënyrë aktive nxori vetë vulën rezervë. Më pas u kodifikua në ligj. KQZ-ja në 2011-n në Tiranë pa një situatë në lidhje me fletën e votimit në kutinë e gabuar, ndërhyri dhe më vonë u kodifikua në ligj. Pra, vota në kutinë e gabuar sot numërohet dhe është e zgjidhur si problem. Pra, ne do të na duhet të ndërhyjmë si parlament, por duhet të kuptojmë arsyen se pse komisioni vendos një herë kështu një herë ashtu?

Lefterije Lleshi (Luzi) - Faleminderit!

Ashtu sikurse e thashë më përpara ne pas çdo procesi zgjedhor bëjmë analiza. Sigurisht që zgjedhje perfekte nuk ka. Ne vetë me iniciativën tonë për zgjedhjet e fundit kemi marrë përsipër të fillojmë punën pa ardhur data e dekretit të Presidentit, sepse me këtë qasje punon KQZ-ja sot. Nuk fillon të punojë ditën kur Presidenti nxjerr dekretin, por punon shumë kohë më përpara për t’i paraprirë problematikave që vijnë në zgjedhje. Me iniciativën time brenda KQZ-së ne kemi shpërndarë një plan pune dhe vetë anëtarët e KQZ-së gjithsecili jemi ndarë në të gjithë Shqipërinë pikërisht duke u marrë me këtë fakt, me të burgosurit, meqenëse e kishim këtë problematikë. Pra, rasti i regjistrimit të burgosurve, me rastin e qendrave të votimit, private dhe ato publike, sikurse edhe me problematika të tjera që kanë të bëjnë me krijimin e kushteve normale të votimit të personave me aftësi të kufizuar.

Nuk e kemi përmbyllur procesin, por procesin e kemi menduar kështu. Kemi përmbyllur pothuajse gjysmën e Shqipërisë; takime me kryetarët e bashkive, me personat të cilët janë përgjegjës. Këtyre të fundit u kemi kërkuar të caktojnë një person, i cili të merret me këtë infrastrukturë të posaçme zgjedhore. Sigurisht, në fund të këtij procesi do të bëjmë një tryezë, në të cilën do të jenë kryetarët e bashkive, do të jetë drejtori i burgjeve, do të jetë prezent edhe Gjendja Civile, për të rakorduar e për të nxjerrë një përfundim se si do të vijojë kjo punë në procesin e ardhshëm zgjedhor.

Mendojmë se kjo punë mbaron brenda tetorit, sepse e thashë: pothuajse në pjesën më të madhe të Shqipërisë ky takim ka mbaruar. Vetë kryetarët e bashkive, nga kontaktet që kemi, janë duke përgatitur informacionin për Komisionin Qendror të Zgjedhjeve.

Sigurisht, ne kemi shkuar atje, por nuk kemi shkuar t’u themi: “shikoni, se ne kemi ardhur, e tashti ça do të bëni ju?”. Në çdo qark që kemi shkuar, në çdo bashki, kemi shkuar me problematikat që na ka sjellë ai qark apo ajo bashki, të evidentuara. Ua kemi lënë në tavolinat e tyre, duke u thënë: “në zgjedhjet e fundit problematikat në këtë bashki kanë qenë: një, dy, tre”. Midis të tjerave ka qenë edhe pjesa e të burgosurve, të cilët duhet të sensibilizohen, sepse ligji është i tillë, që nuk e kemi ne, por në fakt ata duhet t’i regjistrojnë në afatin e caktuar kohor, kur ata kanë më shumë se tre muaj të vendosur në një qendër të tillë rehabilitimi.

Kështu që mund të them se problematikat kemi filluar t’i shikojmë edhe vetë.

Fatmir Xhafaj – Po, faleminderit!

Oerd Bylykbashi – Ka dy gjëra: konsistenca është një vendimmarrje e caktuar, katër me tre. Problemi qëndron, gjithashtu, me konsistencën e rasteve. Pra, për të njëjtën gjë duhej të kishte pasur një lloj qëndrimi, por nuk ka pasur. Ky është shqetësimi që ne kemi në lidhje me KQZ-në tani e shumë kohë. Ka rëndësi për ne, por jo edhe aq shumë sot, se çfarë do të bëjë në të ardhmen Komisioni Qendror i Zgjedhjeve. ne po e detajojmë vazhdimisht Kodin Zgjedhor, në mënyrë që të mos kemi të tepruar, sepse KQZ-ja rregullisht nuk vepron siç thotë ODIHR-i.

Kjo gjë është shumë e thjeshtë: ka një afat prekluziv të Kodit Zgjedhor; mbyllet aty dhe vdes çdo lloj e drejte për t’u regjistruar individit jashtë burgut e individit brenda burgut. Komisioni Qendror i Zgjedhjeve ka bërë një veprim që ligji nuk e lejon.

Lefterije Lleshi (Luzi) – Është ankimuar vendimi i Komisionit Qendror të Zgjedhjeve?

Fatmir Xhafaj – Të lutem!

Oerd Bylykbashi – S’ka rëndësi. Është ligji. Ligji është i pastër në këtë histori.

Unë e përmenda pak më herët rëndësinë që ka Komisioni Qendror i Zgjedhjeve si gardiani i interesit publik, siç e kemi konceptuar këtu në parlament; jo vetëm i interesave ligjore të partive, por i interesit publik. Jo më kot kodi parashikon që Komisioni Qendror i Zgjedhjeve i shpall zgjedhjet të pavlefshme kryesisht. Pra, jo me kërkesë.

Si mund të na e shpjegoni arsyen që Komisioni Qendror i Zgjedhjeve ka vendosur katër me tre, për të mos shpallur të pavlefshme zgjedhjet në një qendër votimi ku, e filmuar, komisionerët hidhnin votat haptazi për partitë politike? Çështja ka ardhur para Komisionit Qendror të Zgjedhjeve, e keni ndarë katër me tre, sepse është gjykuar se nuk ndikon në rezultat. Shkelja ishte. Ndikon apo jo, matja bëhet më pas, thotë ligji. Pse Komisioni Qendror i Zgjedhjeve ka bërë një balancë, kur ligji është drastik në këtë pikë, ndërsa prova është vizuale. Përsëri kemi një votim katër me tre.

Lefterije Lleshi (Luzi) – Unë duhet të përgjigjem në të njëjtën mënyrë, që do të thotë: katër me tre e përcakton ligji. Atë që përcakton tjetër Kodi Zgjedhor është se subjektet zgjedhore mund të adresohen pranë kolegjit zgjedhor në lidhje me këtë vendimmarrje, nëse është e ligjshme apo është e paligjshme vendimmarrja e Komisionit Qendror të Zgjedhjeve. kështu që unë nuk mund t’ju them juve përse katër me tre. E thotë ligji.

Oerd Bylykbashi – Jam dakord! ne e marrim të mirëqenë veprimin e KQZ-së, edhe të kolegjit. Kur bëj pyetjen, e bëj edhe në kuadër të asaj ë duhet të ndryshojë ligji.

Lefterije Lleshi (Luzi) – Është e padiskutueshme se ligji do të ndryshojë, dhe ne kemi sjellë...

Oerd Bylykbashi – Të ndryshojë ligji për mosveprimin e institucionit. Në vitin 2007 Kolegji Zgjedhor shpartalloi dispozitën për pavlefshmërinë...

(Ndërhyrje pa mikrofon)

Më fal, ta mbaroj! U detyruam ta ndryshojmë, në mënyrë që t’i lidhim duart kolegjit. Unë jua bëj pyetjen edhe në këtë aspekt, sepse po të ishte shpallur me pesë me dy, do të ishin shpallur të pavlefshme dhe do të ishte mbajtur ligji në këtë rast.

Një pyetje, që besoj se ka shumë interes për të gjithë ne: raportohet se jeni në shprehur në media, që ligji “Për dekriminalizimin” është i pazbatueshëm.

Mua më rezulton se Komisioni Qendror i Zgjedhjeve ka referuar në Prokurorinë e Përgjithshme...

Lefterije Lleshi (Luzi) – Nuk kam thënë se është i pazbatueshëm, që të mos shkosh më tej. Nuk kam thënë.

Oerd Bylykbashi – Atëherë po e heq këtë pjesë.

Lefterije Lleshi (Luzi) – Kam thënë se ligji ka probleme, kam thënë, jo se është i pazbatueshëm.

Oerd Bylykbashi – Le ta thjeshtojmë gjënë...

Lefterije Lleshi (Luzi) – Jo, po që të mos bësh pyetje ëpr gjëra që s’kam thënë.

Oerd Bylykbashi – Le ta thjeshtojmë gjënë. Komisioni Qendror i Zgjedhjeve ka rol kyç në këtë proces, sipas ligjit. Sigurisht mund të ketë një volum të madh pune. Mua më rezulton se Komisioni Qendror i Zgjedhjeve, përveç dy rasteve që i ka kërkuar Prokuroria e Përgjithshme, me iniciativë, dhe ju i keni çuar, mua nuk më rezulton, mund të jem gabim, na jepni statistika, që vetë Komisioni Qendror i Zgjedhjeve t’i ketë referuar, kryesisht siç thotë ligji, të gjitha rastet që kanë një dyshim të caktuar, t’i çonte në prokurori për t’i verifikuar. E thënë në një mënyrë ndoshta jo të ndershme, pra e raportuar në mënyrë jo të saktë nga mediet, fakti mbetet ky. Sot ligji “Për dekriminalizimin” ka këtë, që edhe pse instrumenti është, instrumenti s’ka prodhuar gjë, dhe pyetja shtrohet nesër. Po nesër çfarë do të ndodhë kur të vijnë përsëri kandidaturat e tjera. A do të kemi ne të njëjtën situatë? Do të ndryshojmë ligjin? Apo është Komisioni Qendror ai që, pasi gërmon, tashti po bëhet një vit, të dërgonte të paktën një, dhjetë, njëzet çështje për verifikim. Mund të dalin ët gjitha të bardha.

Lefterije Lleshi (Luzi) – E para, ne nuk punojmë me statistika për të çuar sa më shumë njerëz në prokurori. E para kjo.

E dyta, unë nuk kama ardhur sot të jap statistika për dekriminalizimin, pasi sikurse ju e dini shumë mirë, prej dekriminalizimit kemi një të drejtë raportimi, datën dhe orën e së cilës që do ta caktojë Komisioni i Ligjeve, e ne do të vijmë t’ju raportojmë në atë datë dhe orë, se çfarë ka bërë Komisioni i Zgjedhjeve në lidhje me këtë ligj.

Së treti, do të thosha se është e nevojshme, është e menjëhershme,q ë ligji “Për dekriminalizimin”, së bashku me Kodin Zgjedhor dhe me ligjet e tjera, duhet të ndryshojnë. Duhet të ndryshojnë patjetër. Ka brenda problematika të tilla, të cilat, në nene të caktuara, ku thuhet: “mund”, “duhet”. Ndryshe thuhet në një nen, ndryshe thuhet në ligj, ndryshe thuhet në vendim. Ju jeni koshient, sepse pikërisht juve dhe zotin Balla ju kemi kërkuar që në krye të herës, që të bëni një tryezë me Komisionin Qendror të Zgjedhjeve apo me grupet e tjera, me institucionet e tjera, ku të na shpjegonit problematika që ne kishim. E shtymë dy herë tryezën, sepse ju nuk u paraqitët. Sot jemi para faktit se ne e kemi zbatuar atë ligj ashtu siç e kemi menduar.

Tani, është drejtë apo gabim, kur të mblidhemi e të raportojmë, sepse e keni vënë edhe si detyrim ligjor raportimin pranë Komisionit të Ligjeve, aty do të përballemi me të gjitha problematikat që sjell ligji. Sigurisht, ne i kemi gati për t’i futur, sepse Kodi Zgjedhor kërkon urgjent një ndryshim edhe në lidhje me këtë ligj. I kemi gati edhe këto ndryshime. Na thoni kur të vijmë në Komisionin e Reformës Zgjedhore, dhe i kemi gati. E kemi mbaruar edhe këtë.

Oerd Bylykbashi – Zonja Luzi, sigurisht që nuk po diskutojmë aktivitetin e KQZ-së për dekriminalizimin, por po flasim për aktivitetin e KQZ-së, ku anëtarët kanë një rol. Ju po konkurroni ëpr këtë pozicion si dhe një kandidat tjetër.

Lefterije Lleshi (Luzi) – Unë kam qenë ajo që kam kërkuar inicimin. Unë vetë, personalisht.

Oerd Bylykbashi – Ju lutem! Ju dëgjova deri në fund, që ta vazhdojmë këtë pjesë. Gjithsesi, qoftë unë, qoftë zoti Balla, sado kapacitet që të kemi, jemi deputetë të thjeshtë të një parlamenti, i cili ka miratuar një ligj. Ne nuk jemi interpreto të atij ligji.

Juve zbatoni...

Lefterije Lleshi (Luzi) – Po nuk na thatë kështu.

Oerd Bylykbashi –...jeni operatorët e parë të atij ligji. Unë nuk e pashë atë “mund” dhe “duhet”. Nuk e kuptova pse sot nuk kemi të çuar për verifikim në Prokurorinë e Përgjithshme.

Çështje tjetër; Komisioni Qendror i Zgjedhjeve, me votim katër me tre ka vendosur të refuzojë pajisjen me formularë për mbledhjen e firmave ëpr referendume lokale. Sot po bëhet çështje shumë e madhe dhe po diskutohet përherë e më tepër e drejta e zgjedhësve për t’u shprehur në mënyrë direkte, pra demokracia direkte. Pra, a mund të na e shpjegoni arsyen se pse ju mohuat një të drejtë për dy-tre referendume që ishin në Tiranë, që të pajiseshin zgjedhësit, mandej i mblidhnin firmat apo s’i mblidhnin, ishte kushtetuese apo jo, është një moment tjetër.

Lefterije Lleshi (Luzi) – Po, ta them unë.

Fatmir Xhafaj – Ju lutem! vetëm ka një gjë: këto kanë të bëjnë me CV-në e zonjës Luzi.

Lefterije Lleshi (Luzi) – Po s’ka gjë.

Fatmir Xhafaj – Jo jo, unë dua të vijë KQZ-ja në raport, sepse kyë shtë vendim i KQZ-së.

Lefterije Lleshi (Luzi) – Po ta them unë edhe veprimin e KQZ-së. S’ka gjë, më lejoni t’i përgjigjem.

Fatmir Xhafaj – Dakord!

Lefterije Lleshi (Luzi) – Atëherë, ne i jemi referuar një vendimi të kolegjit zgjedhor për të bërë pikërisht këtë interpretim, që paraprakisht, duhej të shqyrtonim objektin e ëkrkesës, dhe pasi Komisioni Qendror i Zgjedhjeve të vendoste mbi këtë objekt, pastaj duhej të merrej vendimi për shpërndarjen apo jo të formularëve për pajisjen. Është një vendim i Kolegjit Zgjedhor.

Oerd Bylykbashi – Objekti i kërkesës ishte për parkun e Tiranës ose për parkimin...

Lefterije Lleshi (Luzi) – Më fal, unë po të them se si e morëm ne vendimin. Pastaj gjykimin bëjeni ju. Merrni edhe vendimin e kolegjit, të parin, të cilit u jemi referuar, merrni edhe vendimin e dytë të kolegjit, pas vendimmarrjes së Komisionit Qendror të Zgjedhjeve, pastaj unë vi prapë këtu kur të doni dhe ju sqaroj.

Oerd Bylykbashi – Edhe një pyetje e fundit: Kodi Zgjedhor ka vënë një detyrim, që Komisioni Qendror i Zgjedhjeve, kolegjialisht, të hartonte një plan-veprimi dyvjeçar për elektronikën. Si PS-ja, si PD-ja ashtu edhe partitë e tjera mendojnë se elektronika në zgjedhje, me gjithë problematikat që ka, dhe ju jeni përballuar me probleme teknike, e këtë e dinë të gjithë...

Lefterije Lleshi (Luzi) – Po.

Oerd Bylykbashi – Madje, në teknikën që jua pamundësuan në fund fare, një proces... A keni bërë ju, a keni miratuar ju ndonjë projekt a ndonjë plan-veprimi dyvjeçar, ku të analizohej edhe dështimi i atyre dy projekteve? A keni hartuar një plan dyvjeçar? Kjo është kërkesë e ligjit.

Lefterije Lleshi (Luzi) – Atëherë, ne nuk kemi hartuar asnjë plan dyvjeçar, ku të analizojmë edhe senin dhe setin, por ne i kemi analizuar ato në analizën që u kemi bërë zgjedhjeve, kur përdoren edhe këto dy teknologji. Analizën e kemi bërë dhe e kemi shumë të qartë se përse ato dy projekte nuk shkuan deri ën fund.

Oerd Bylykbashi – I di këto të dyja. Po flas për planin dyvjeçar.

Lefteri Luzi – Jo, plan dyvjeçar jo. ne nuk e kemi lexuar ligjin.

Fatmir Xhafaj – Faleminderit!

Faleminderit zoti Bylykbashi!

Zoti Manja.

E keni për procedurë? Pyetje? Dakord! Kujtova se ishte për procedurë. Ndjesë. Po.

(Ndërhyrje pa mikrofon)

Ju lutem, ju lutem!

Ulsi Manja – Me OSBE/ODIHR-in mbaroi kolegu Bylykbashi. Unë po kthehem pak në Shqipëri.

Zonja Luzi, ju thatë se gjatë kohës që keni drejtuar Komisionin Qendror të Zgjedhjeve, keni administruar dy palë zgjedhjesh në Shqipëri.

Lefterije Lleshi (Luzi) – Po. Edhe shtatë.

Ulsi Manja – Tani, natyrisht, ju jeni organ që i administroni zgjedhjet nga pikëpamja administrative, si institucion qendror, por vendimmarrja e këtij komisioni, në raport me respektimin e të drejtave të shtetasve për të zgjedhur e për t’u zgjedhur, kontrollohet nga Kolegji Zgjedhor.

Gjatë kësaj kohe që ju keni drejtuar Komisionin Qendror të Zgjedhjeve cili ka qenë raporti i vendimmarrjes, që është kontrolluar nga Kolegji Zgjedhor? Pra, sa ka qëndruar apo sa është mbështetur në Kolegjin Zgjedhor vendimmarrja e Komisionit Qendror të Zgjedhjeve? Sepse ai është, le të themi, kontrolli gjyqësor i vendimmarrjes së Komisionit Qendror të Zgjedhjeve.

Faleminderit!

Fatmir Xhafaj – Faleminderit!

Po, zonja Luzi.

Lefterije Lleshi (Luzi) – Po, sigurisht, ne e quajmë kontroll, në fakt, atë çfarë bën kolegji në lidhje me vendimmarrjen e KQZ-së, sepse do t’i shërbejë punës së komisionit edhe në të ardhmen. Pra, këto vendime të kolegjit ne i respektojmë dhe i analizojmë deri në detaje, për shkak të referencave që do t’u bëjmë pastaj vendimmarrjeve tona.

Ne ndjehemi shumë mirë kur subjektet zgjedhore u drejtohen kolegjit, thjesht për të provuar edhe veten tonë në lidhje me vendimmarrjen. Do të doja ta formuloja ndryshe përgjigjen; do të thosha se ato vendime në lidhje me vendimmarrjen tonë, të cilat kolegji i ka rrëzuar, janë të papërfillshme në krahasim me ato çfarë kanë shkuar.

Fatmir Xhafaj – Faleminderit!

Ka pyetje të tjera?

Po, zonja Rista.

Adelina Rista – Zonja Luzi, ju vini nga një start ndryshe nga të tjerët, që u paraqitën sot këtu. Të gjithë kanë një start të caktuar kur vijnë e kandidojnë. Ju vini nga starti i kryetares aktuale të Komisionit Qendror të Zgjedhjeve, kështu që ju vini nga një eksperiencë shumëvjeçare në këtë post. E njihni mirë ligjshmërinë e Komisionit Qendror të Zgjedhjeve, gjë që jua jep eksperienca, e njihni mirë institucionin që përfaqësoni. Kësisoj starti juaj është ndryshe.

Në bazë të kësaj, në këtë këndvështrim, ju paraqitët para nesh edhe atë se çfarë ju do të ndryshoni, nëse do të jeni në krye të Komisionit Qendror të Zgjedhjeve. I rreshtuat para nesh: një, dy, tre, katër, që nga hartimi i strategjisë, zbatimi i ligjshmërisë, përmirësimi profesional i administratës e ët tjera e të tjera, njëra pas tjetrës.

Unë do t’ju bëja një pyetje konkrete, të përgjithshme në fakt, por që flet shumë: gjatë gjithë kësaj periudhe që ju keni qëndruar në Komisionin Qendror të Zgjedhjeve, ku dhe jeni aktualisht, a mendoni se keni qenë e balancuar në vendimmarrjet tuaja? A ka pasur raste të subjektivizmit, në një këndvështrim të caktuar politik të interpretimit të ligjit. Përtej ligjit, në ndërgjegjen tuaj a rëndon diçka, ndonjë vendimmarrje që ju peshon në ndërgjegje? Sepse, fundi i fundit, vërtetë është zbatimi i ligjit, por ju bëni një betim për zbatimin e ligjit. A rëndon diçka në ndërgjegjen tuaj? Kaq. Faleminderit!

Lefterije Lleshi (Luzi) – Në fakt pas çdo vendimmarrjeje unë reflektoj, sigurisht, edhe për vendimin që sapo kam marrë. Reflektoj dhe them nëse bëra mirë ose jo, nëse vendimi im ishte korrekt me ligjin apo jo. Them: sa herë që t’i kthehem mbrapa çdo vendimmarrjeje që kam bërë, unë nuk kam për të ndryshuar asgjë.

Faleminderit!

Fatmir Xhafaj – Faleminderit zonja Luzi!

(Incizim i dobët)

Të vijë kandidati tjetër, Anton Lleshaj.

Zoti Lleshaj, faleminderit!

Ju keni aplikuar për të qenë kandidat për postin e kryetarit të Komisionit Qendror të Zgjedhjeve. keni paraqitur edhe dokumentacionin, që është në vëmendjen e anëtarëve të komisionit. Do t’ju lutesha që, në mënyrë të përmbledhur, shkurt, të na thoshit diçka për CV-në tuaj dhe për interesin e lartë që keni treguar për të shërbyer në këtë detyrë me përgjegjësi të veçanta.

Po, zoti Lleshi.

Anton Lleshaj – Ju faleminderit për mundësinë që më keni dhënë të flas para këtij komisioni të nderuar. Unë në fakt kam konkurruar edhe një herë tjetër, vitin e kaluar, për kryetar KQZ-je. Duke pasur parasysh se i plotësoj kriteret ligjore, e kam përsëritur për herë të dytë, nëse vendi është bosh.

Unë kam mbaruar Fakultetin Ekonomik në vitin 1985. Në vijim kam punuar gjashtë vjet në ekonomi. Pesë vjet kam punuar si shef prapavije në repart ushtarak. Në vitin 1995, me vendim të Këshillit të Lartë të Drejtësisë, kam qenë në përbërje të trupit gjykues në gjykatën e rrethit gjyqësor Mirditë.

Nga viti 2000 e në vazhdim jam koordinator i Qendrës së Ndërmjetësimit në Mirditë, dhe avokat.

Aplikimin tim e mbështes në eksperiencën e punës e në rezultatet. I kam dërguar të gjitha materialet dhe dokumentacionin përkatës.

Jam i lirë për pyetjet, nëse ka ndonjëri prej jush.

Fatmir Xhafaj – Faleminderit për prezantimin, zoti Lleshaj, për prezantimin që patë të arsyeshme për të bërë para këtij komisioni, i cili e ka për detyrë t’ju dëgjojë!

Ka pyetje nga kolegët apo është e qartë për juve? Sepse keni lexuar edhe dokumentet.

Oerd Bylykbashi – Në mënyrë shumë koncize.

Për ju, si kandidat për një post kaq të rëndësishëm, që dikur ka qenë post kushtetues, nga ç’keni parë e lexuar për performancën e derisotme të Komisionit Qendror të Zgjedhjeve, cila do të ishte çështja kryesore, në mënyrë koncize, që mendoni se duhet ndryshuar?

Anton Lleshaj – Kodi Zgjedhor aktual, që është në fuqi, ka përcaktuar se anëtarët e komisionit caktohen tre nga njëra forcë e tre nga forca tjetër politike, me mirëkuptim, ndërsa kryetari duhet të jetë i paanshëm. Duke qenë se unë e kam pasqyruar në materialet, unë nuk marrë pjesë në forcat politike, por vij nga shoqëria civile, për arsye të punës që kam bërë, mendoj se plotësoj kriterin. Në vazhdimësi, sa i takon drejtimit të Komisionit Qendror të Zgjedhjeve, në qoftë se më jepet mundësia, duke pasur parasysh shkollën, eksperiencën dhe rezultatet e punës, mendoj se do të jap rezultatin tim, duke qenë i paanshëm, kryesorja të mos ketë konflikte, sepse, jo që kemi parë, por me sa dimë nga shtypi e nga të gjitha këto, si Komisioni i Ligjeve nuk e dimë, por dimë se ka pasur përplasje.

Fatmir Xhafaj – Po, faleminderit, zoti Lleshaj!

Besoj se nuk ka pyetje të tjera. Jeni të qartë.

Shumë faleminderit! Mund të vazhdoni! Gjithë të mirat!

Anton Lleshaj – Faleminderit është prej jush!

Fatmir Xhafaj – Ditë të mbarë!

Tani ne i dëgjuam të pesë kandidatët. Siç thamë, ishin gjashtë kandidatë për të qenë kandidatë, që të jemi të saktë sipas përcaktimit të Kodit Zgjedhor, për kryetar të Komisionit Qendror të Zgjedhjeve. Një prej tyre është tërhequr. Kanë mbetur pesë kandidatura. Sot ishte seanca dëgjimore. Gjithashtu, kolegët e kanë mbi tavolinë dokumentacionin përkatës.

Dëgjuam paraqitjen e kandidatëve. Në një ditë tjetër do të caktojmë mbledhjen e komisionit për të bërë shqyrtimin formal dhe në meritë, të kandidatëve për të qenë kandidat, për kandidatët që do t’i paraqiten seancës plenare, për të votuar për kryetar të Komisionit Qendror të Zgjedhjeve.

Ky është ligji dhe ne do të zbatojmë ligjin, mbështetur në procedurën parlamentare, që ka parashikuar Rregullorja e Kuvendit të Shqipërisë.

Besoj se edhe ju jeni dakord që ta mbyllim këtu. Edhe ju të medies jeni të kënaqur nga kjo seanca dëgjimore, me sa shoh. keni marrë lajme, keni parë vizione, koncepte e CV, kështu që mund të vazhdoni.

Faleminderit edhe juve!

Ditë të mbarë! Më të mbarë nga ç’e kishit dje.

Mirupafshim!

MBYLLET MBLEDHJA