Microsoft Word dunyoning ishlari ziyouz com doc

OPAMNI TOPIB OLDIM
Bayram qanaqa bo‘lishini bilasizmi? Bilmasangiz bilib qo‘ying! Bayram degani shuki, 
hammamiz yasanamiz. Bu — birinchidan. To‘g‘ri, dadam hammamizga baravar 
boshoyoq kiyim qilib berolmaydi. Lekin hech bo‘lmasa, bittadan ohorlik kiyamiz. Undan 
keyin oyim albatta palov, juda bo‘lmasa, shovla pishiradi. Bu — ikkinchisi. Nihoyat, 
bayram degani shuki, men onamga ergashib albatta tog‘amnikiga boraman. Tog‘amning 
men tengi o‘g‘li bor. Maza qilib obaki yeymiz. Iloji bo‘lsa, «Tarzan» kinosiga tushamiz. 
Tarzanni bilasizmi? Xuddi maymundek daraxtdan-daraxtga sakraydi. Yo‘lbarsdan ham, 
arslondan ham qo‘rqmaydi. 
Jo‘raboshimiz aytgan, o‘zi ko‘rgan. 
Mana, bugun oyim non yopyapti. Arpa non unchalik oppoqmas. Ammo juda mazali. Ana, 
non isi kelyapti. Oyim menga atab ataylabdan kulcha yasagan. Kulcha nondan oldin 
pishadi: kichkina-da! Ana, oyim rapidani qo‘liga kiyib, to‘nkarilgan zambil ustiga chiqdi. 
Bo‘lmasa tandirning tepasiga bo‘yi yetmaydi. O‘sha yerdan turib buyurdi. 
— Do‘ppingni och! 
Do‘ppimni boshimdan yulib oldimu tutib turdim. Shu ondayoq cho‘g‘dek issiq, qip-qizil 
non do‘ppiga tushdi. Jiyaklari titilib ketgan do‘ppimni changallagancha ko‘chaga 
yugurdim. 
— Hoy, sekinroq, yiqilasan! — deb qoldi oyim chirqillab. 
Nega yiqilar ekanman! Orqamdan kuchugim ham yugurgilab qoldi. Biladi-da, o‘ziniyam 
ulushi borligini. Ikkalamiz oldinma-ketin chopishib, Shirin arig‘ining bo‘yiga keldik. Issiq 
nonni suvga tashladim-da, o‘zim pastga qarab chopib ketdim. Gurji kuchugim ham 

---

Dunyoning ishlari. O’tkir Hoshimov