Ergashxodjaeva Sh. Dj., Samadov A. N.,Alimxodjayeva, N. E., Sharipov I. B. Marketing kommunikatsiyasi

 
 
 

---

18 
1-BOB. MARKETING KOMMUNIKATSIYASINING
NAZARIY ASOSLARI 
 
1.1. Marketing kommunikatsiyasini o’rganishning dolzarbligi 
 
Axborotlashgan jamiyat nazariyasi tarafdorlarining biz ko’p sonli va xilma-xil 
axborot texnologiyalari kanallari orqali tarqatiladigan ommaviy axborotlashgan 
jamiyat asrida yashamoqdamiz degan fikrlari dolzarb ahamiyatga ega. Axborotlashgan 
jamiyatda esa kommunikatsiyalar asosiy element hisoblanadi. 
O’z navbatida, axborotlashgan jamiyat reklama bilan chambarchas bog’liq 
bo’lib, brendlar iste’molchilardan an’anaviy ommaviy axborot vositalari va internet 
sahifalari orqali moyillik talab qiladi. Potensial xaridorlar bilan muloqotda bo’lar ekan, 
marketologlar xaridorlar didini shakllantiradi, ularning fikr-mulohozalarini 
yo’naltiradi, moda yo’nalishlarini belgilab beradi. Bunday sharoitlarda hozirgi kunda 
dunyo ko’p jihatdan marketing kommunikatsiyalari vositasida shakllanmoqda degan 
fikr asosga ega emas deb aytish qiyin. 
Ta’kidlash joizki, hozirgi paytda kommunikatsiyalarni jiddiy nazariy o’rganish 
va bu sohadagi bilimlardan marketing uchun amaliy foydalanish dolzarb ahamiyatga 
ega. Hozirgi sharoitlarda kommunikatsiya qo’shilgan qiymat yaratishning real omili 
hisoblanadi. Korxonalar bozor qiymatini baholashda turli nomoddiy omillar, 
chunonchi, nufuz, obro’-e’tibor, brend, ishbilarmonlik aloqalari – ya’ni 
kommunikatsiyalar yordamida yaratiladigan barcha narsalar tobora katta rol 
o’ynamoqda. 
Marketing kommunikatsiyalari qanday qonunlar bo’yicha amalga oshiriladi, 
ularni qanday boshqarish mumkin yoki qanday qilib va nima uchun marketing 
axborotlari iste’molchiga jiddiy ta’sir ko’rsatadi? bu savollar sosiologiya, psixologiya, 
iqtisodiyot va ular bilan bog’liq boshqa bir qator fanlarning tadqiqotlar sohasini tashkil 
etadi. 
Marketing kommunikatsiyalari fenomeni bilan bog’liq nazariy fikrlashni talab 
etadigan asosiy elementlar kommunikatsiyalar, axborot ta’siri, integrasiyalangan 
marketing kompleksi kabi tushunchalar hisoblanadi.