Химмотология

8.2.3. Ингибиторли пластик сурков мойлари


Ингибиторли пластик сурков мойлари. Тажрибалар шуни кўрсатадики, ингибиторли пластик сурков мойларини қишлоқ хўжалиги техникаларининг консервациясида ишлатиш жуда ҳам мақсадга мувофиқ ҳисобланади. Коррозиядан ҳимояланиш самарадорлигини ошириш учун сурков мойлари таркибига турли хилдаги мойда эрувчи қўшимчалар (оксидланган петралатум ва церезин, улар асосида олинган маҳсулотлар, нитритланган мой, махсус синтез қилинган коррозия ингибиторлари-аминлар, амидлар, эфирлар, сунъий ёғ кислоталари ва бошқалар) кўшилади. Бу қўшимчалар консистент пластик сурков мойларининг қовушқоқлик ҳарактеристикаларини ўзгатирмасдан, уларнинг гидрофиллигини оширади, намликни ютиш ва металлардаги коррозияланиш жараёнларини анчагина секинлаштиради.
Пластик сурков мойларини ишлаб чиқариш шароитларида тайёрлаш дастлабки хом ашё туридан қатъий назар умумий ҳолда бир хил бўлади. Ишлаб чиқариш қозонларида ёғ ва ёғ кислоталарини 50:50 нисбатдаги пропорцияда минерал мой қўшган ҳолда, совунлантириш амалга оширилади. 80°С ҳароратдаги аралашма устига элак орқали, ундан юқоридаги идишдан оҳакли сут қуйилади. Оҳакли сутни ёки ишқорни қуйишдан олдин, бутун совунланиш жараёнида ҳаракат қиладиган механик аралаштиргични ишга туширилади. Совунланиш жараёни бошлангандан сўнг, 80-90°С ҳароратдаги қизиган қолган минерал мойларни секин-аста қуйиб борилади. Совунланиш жараёнини бошланганлигини билиш учун, олиб совутилган намунани қўл билан босиб кўрганда, намуна ўзидан мой ёки сувли суюқликни чиқармаслиги лозим. Қолган минерал мойларни қўшилганидан сўнг, бир жинсли масса ҳосил бўлгунига қадар, аралаштирилади ва кейин оғзи яхши маҳкамланади ҳамда қозон жўмрагидан қолдиқ сувни чиқариб ташланганидан сўнг, 5-6 соат мобайнида тиндирилади. Совунланган массани сув билан совутиладиган бошқа бир қозонга қуйиб олиниб, массани 85-90°С ҳароратларда совутиш учун қўйилади. Юқорида келтирилган барча адабиётларга таянган ҳолда, ҳар қандай хом ашё ресурсларидан истаган таркибдаги пластик сурков мойларини тайёрлаш имкониятлари мавжуд.