Germaniya ukrainalik qochoqlarni mamlakatga joylashtirish uchun 2 mlrd yevro ajratadi

Hindistonda koronavirusning yangi XE shtammi qayd etildi

Hindiston hukumati mamlakatda koronavirusning yangi XE shtammi bilan kasallanish bo‘yicha birinchi holatni tasdiqladi, deb xabar bermoqda Hindustan Times.

Foto: Reuters

Brixan Mumbay Munitsipal korporatsiyasi (BMC) bayonotida aytilishicha, omikron shtammining ikki kichik turi BA.1 va BA.2 dan iborat ushbu gibrid fevral oyida Janubiy Afrikadan Mumbayga kelgan 50 yoshli ayolda aniqlangan. Bemorda hech qanday qo‘shimcha kasallik bo‘lmagan, koronavirus esa simptomsiz kechgan. Ayolga deyarli bir oy o‘tib — mart oyida tashxis qo‘yilgach, u karantinga yotqizilgan.
XE — omikron turidagi shtammlarning mutatsiyasi bo‘lib, dastlabki ma’lumotlarga ko‘ra, u boshqa mutatsiyalarga qaraganda taxminan 10 foiz tezroq yuqishi mumkin. Jahon sog‘liqni saqlash tashkiloti (JSST) ma’lumotlarida qayd etilishicha, XE (BA.1-BA.2) birinchi marta 19-yanvarda Buyuk Britaniyada aniqlangan va shundan beri mazkur shtamm bilan kasallanishga oid 600 dan ortiq holatlar haqida xabar berilgan.
Nashrning yozishicha, yangi shtammi Tailand va Yangi Zelandiyada ham topilgan. JSST mutatsiyani muhokama qilishdan oldin qo‘shimcha ma’lumotlar kerakligini aytdi.

NATO davlatlari Rossiyaga nisbatan keyingi munosabatlar to‘g‘risida kelisha olmayapti — NYT

NATOga a’zo davlatlar Ukraina atrofidagi vaziyat tufayli Rossiya bilan munosabatlarda keyingi qadamlar bo‘yicha o‘zaro kelisha olmayapti, deb yozadi The New York Times.

Foto: AP Photo

Nashr xabariga ko‘ra, Boltiqbo‘yi davlatlari va Polsha Rossiya bilan munosabatlarni to‘liq uzishni talab qilmoqda. Fransiya, Germaniya va Turkiya esa hozirgi vaziyatdan qat’i nazar, Rossiya hukumati bilan aloqalarni davom ettirish zarur deb hisoblaydi.
6 — 7-aprel kunlari Bryusselda NATOga a’zo davlatlar tashqi ishlar vazirlarining yig‘ilishi bo‘lib o‘tmoqda. Unda muhokama qilinayotgan mavzulardan biri alyansning Ukrainadagi vaziyat bilan bog‘liq harakatlaridir.
Eslatib o‘tamiz, Rossiya prezidenti Vladimir Putin 24-fevral kuni Ukrainada “denasifikatsiya va demilitarizatsiya” maqsadida harbiy operatsiya boshlanganini e’lon qildi. Kiyev Moskva bilan diplomatik munosabatlarni uzdi va harbiy holat joriy qildi.
G‘arb Rossiyaning harakatlariga javoban unga qarshi keng ko‘lamli sanksiyalar kiritdi. Shuningdek, qator davlatlar, jumladan AQSH, Daniya, Fransiya, Germaniya, Polsha, Bolgariya, Latviya, Litva va Estoniya Rossiyaning diplomatik vakolatxonalari xodimlarini hududidan chiqarib yuborishini ma’lum qilgan. Yevropa Ittifoqining bir qancha davlatlari — Italiya, Belgiya, Niderlandiya va Irlandiya ham o‘nlab rossiyalik diplomatlarni chiqarib yubordi.