Germaniya ukrainalik qochoqlarni mamlakatga joylashtirish uchun 2 mlrd yevro ajratadi

BMT: Ukrainada urush boshlanganidan beri 1480 nafar tinch aholi halok bo‘ldi

Rossiya tomonidan Ukrainada harbiy operatsiya boshlanganidan beri 1480 nafar tinch aholi halok bo‘lgan, shuningdek, 2195 kishi yaralangan. Bu haqda BMTning inson huquqlari bo‘yicha oliy komissari boshqarmasi ma’lum qildi. Ta’kidlanishicha, gap faqatgina tasdiqlangan holatlar haqida ketmoqda, haqiqiy raqamlar bundan ko‘p bo‘lishi mumkin.

Foto: AP Photo

O‘ldirilgan 1480 fuqaroning 331 nafari erkak, 211 nafari ayol, 22 nafar qiz va 40 nafar yigit, shuningdek, 61 nafar bolalar va 815 nafari jinsi hozircha aniqlanmagan katta yoshli insonlardir. Yaralanganlarning 253 nafari erkak, 194 nafari ayol, 43 nafar qiz va 40 nafar yigit, shuningdek, 100 nafar bola va 1565 nafari jinsi hozircha aniqlanmagan katta yoshli insonlardir.
Donetsk va Lugansk viloyatlarida jami 474 kishi halok bo‘lgan, 1065 kishi yaralangan. Kiyev nazorati ostidagi hududlarda esa ushbu ko‘rsatkich mos ravishda 407 va 808 nafarni tashkil etmoqda. Donetsk va Lugansk Xalq Respublikalari hududlarida — 67 va 257 nafar. Ukrainaning qolgan hududlarida 1006 nafar tinch aholi halok bo‘lgani va 1130 kishi jarohat olgani qayd etilgan.
BMTning ta’kidlashicha, qayd etilgan qurbonlarning aksariyati katta maydonni yakson qilishga mo‘ljallangan portlovchi qurilmalar, og‘ir artilleriya va zalp o‘t ochish tizimlari, bundan tashqari, raketa va aviatsiya zarbalari yordamida amalga oshirilgan zarbalar oqibatida halok bo‘lgan.
Kiyev viloyatidagi Bucha shahrida tinch aholining qirg‘in qilingani 2-aprel kuni, Rossiya harbiylari chiqib ketganidan keyin Ukraina armiyasi shahar ustidan nazorat o‘rnatgan paytda ma’lum bo‘ldi. Ukraina prezidenti mahalliy aholining o‘limida rossiyalik askarlarni aybladi. Rossiya Mudofaa vazirligi halok bo‘lganlarning video va suratlarini “provokatsiya” va “G‘arb ommaviy axborot vositalari uchun Kiyev rejimining tomoshasi” deb atadi. Vazirlik ma’lumotlariga ko‘ra, rus harbiylari 30-mart kuni shaharni tark etgunga qadar Bucha shahridagi birorta ham mahalliy aholi “hech qanday zo‘ravonlik harakatlaridan jabr ko‘rmagan”.