Физиология. Вазифалари ва усуллари. Тиббиётдаги аҳамияти. ҚИСҚача тарихи. ҚЎЗҒалувчан тўҚималар физиологияси

Капиллярларда қоннинг оқиши
Қон айланиши катта доирасидаги жами капиллярлар бир неча миллиарддан ошади, шунинг учун капиллярлар соҳасида қон йўли анча кенгайгандир. Капиллярлар узунлиги 0,5-1,1 мм, диаметри 5-7 мкм бўлган жуда ингичка томирлардир. Уларнинг девори бир қават эндотелий ҳужайралари ва базал мембранадан иборат. Капиллярлар ҳужайралар орасида жойлашган бўлиб, бевосита уларга тегиб туради.Одам гавдасидаги барча капиллярларнинг йиғма узунлиги 100000 км бўлиб, ер шарини экватор бўйлаб уч марта ўраб олиши мумкин. Капиллярлар деворининг умумий (моддалар диффузияси содир бўладиган) сатхи 1500га ни ташкил этади. Капиллярда қон оқимининг тезлиги 0,5-1мм\сек. Модда алмашинуви жадал бўлган тўқималарнинг 1 мм кв кундаланг кесимидаги капиллярлар сони модда алмашинуви суст бўлган тўқималардагига қараганда бир неча баравар кўп. Масалан, юракнинг 1 мм кв кесимидаги капиллярлар сони скелет мускулидагига қараганда икки баравар кўп.
Капиллярларнинг икки хили ажратилади. Улардан бири артериолалар билан венулалар орасидаги энг калта йўлни ҳосил қилади (магистрал капиллярлар). Иккинчиси магистрал капиллярларнинг ён шоҳчалари бўлиб, уларнинг артериал учидан чиқиб, веноз учига қуйилади. Мана шу ён шоҳчалар капиллярлар турини ҳосил қилади. Қон оқимининг ҳажм ва чизиқли тезлиги магистрал капиллярларда ён шоҳчаларга нисбатан катта. Магистрал капиллярлар қоннинг тақсимланишида ва микроциркуляциянинг бошқа жиҳатларида муҳим роль ўйнайди.
Деворининг ультра структурасига кўра, капиллярлар 3 турга бўлинади: 1) девори узлуксиз, бутун капиллярлар, 2) фенестрацияланган, девори ромсимон тешикли капиллярлар, 3) девори узилган капиллярлар. Биринчи турдаги капиллярлар деворида тешиклар жуда кичик, улар орқали сув, электролитлар ва кичик молекулали моддалар ўтади. Улар мускулларда, ўпкаларда, ёғ тўқимасида кўп тарқалган. Фенестрацияланган капиллярлар сўрилиш жараени жуда жадал бўлган буйраклар ва ичак шиллиқ пардасида кўпроқ учрайди. Учинчи турдаги синусоид капиллярлар девори кўп ерда узилган бўлиб, ундан суюқлик, йирик молекулалар ва қон ҳужайралари ўтиши мумкин. Бундай капиллярлар кўмикда, жигар ва талоқда учрайди.
Капиллярдаги қон босими бевосита ўлчанади: бинокуляр микроскоп остида капиллярларга электроманометрга уланган ингичка канюла киритилади. Одамда капиллярнинг артериал учида босим 32 мм сим. уст. га тенг. Буйрак коптоклари капиллярларида босим 65-70 мм сим.уст.га ётади.
Ҳар бир аъзода қон фақат “навбатчи” капиллярларда оқиб туради. Капиллярларнинг қолган қисми қон айланишида иштирок этмайди. Аъзо шиддат билан ишлаганда (масалан, мускул қисқарганда, ёки безнинг секретор фаоллигида) модда алмашинуви кучайиб, ишлаб турган капиллярлар сони ошиб кетади. Капиллярларда қон айланишининг нерв ва гуморал бошқарилиши артерия ва артериолалар орқали амалга оширилади. Артериолалардаги босим кўтарилганда ишлаётган капиллярлар кўпаяди.
Қон ва тўқимааро суюқлик ўртасида сув ва модда алмашинувида диффузия ва фильтрация жараёнлари асосий ўрин эгаллайди.
Сув, Na⁺, Cl^–, глюкозага ўхшаган сувда эрийдиган моддалар, ёғда эрийдиган алкогольга ўхшаш моддалар капилляр девори орқали диффузияланади. Капиллярларнинг ҳар хил моддаларни ўтказувчанлиги мазкур модда молекуласи катталиги ва капилляр деворидаги говаклар катталиги нисбатига боғлиқ. Масалан, оқсил молекуласи диффузияланмайди. О₂ ва СО₂ диффузияланишига капилляр девори тўсқинлик қилмайди.
Капиллярда фильтрланиш ва қайта сўрилишнинг тезлиги қуйидаги кучларга боғлиқ:
а) капиллярдаги гидростатик босим – Р_ГК
б) тўқималараро суюқликдаги гидростатик босим – Р_ГТ
в) капиллярдаги қон онкотик босими – Р _ОК
г) тўқимааро суюқликнинг онкотик босими – Р_ОТ
д) фильтрланиш коэффиценти – К

V= (Р_ГК + Р_ОТ - Р_ГТ - Р_ОК) · К

Агар V мусбат чиқса – фильтрланиш, V манфий бўлса – реобсорбция (сўрилиш) рўй беради.

Капиллярнинг артериал учида

V = 32,5+ 4,5-25-3=9мм с.у., яъни самарали фильтрловчи босим 9 мм с.у.
Капиллярнинг веноз учида
V = 17,5+4,5-25-3= - 6мм с.у, яъни самарали фильтрловчи қонга томон босим 6 мм с.у.
Демак, фильтрловчи босим реабсорбцияловчи босимдан юқори (9 мм сим.у. > 6 мм с.у.). Шунинг учун капиллярнинг артериал қисмида фильтрланган суюқликнинг фақат 90% веноз қисмида қайта сўрилади, 10% эса лимфага ўтади.