Эгамбердиева Т

Коммуникацияни ривожлантириш ҳукуматлараро дастури
Коммуникацияни ривожлантириш ҳукуматлараро дастури ахборот воситаларини ривожлантириш ва ахборот лойиҳаларини қўллаб-қувватлаш орқали барқарор тараққиёт ва демократия ғояларини тарғиб этишга йўналтирилган.
Ўзбекистон ушбу дастур лойиҳаларида фаол қатнашиб келган. 1997 йилда Тошкент шаҳрида Медиа манбаи маркази ташкил этилиши ушбу дастур томонидан қўллаб-қувватланган. 1998-2007 йиллар давомида журналистикага оид бир қатор ўқув қўлланмалари ишлаб чиқилди ва нашр этилди. «Журналистлар учун инновацион тренинглар ва ўқув дастурлар» доирасида бир қатор ўқув тренинглар ташкил этилди. Шу жумладан, «Ахборот тайёрлашнинг назарияси ва амалиёти», «Интернет журналистика», «Интернетда муаллифлик ҳуқуқлари», «Замонавий журналистика», «Ўзбекистоннинг мулғтимедиа ахборот базаси» ва бошқалар. Ҳар йили Ўзбекистонда 3 май куни матбуот эркинлиги кунига бағишланган давра суҳбати Оммавий ахборот воситаларини демократлаштириш ва қўллаб-қувватлаш жамғармаси билан ҳамкорликда ташкил этилади. ЮНЕСКОнинг Тошкентдаги ваколатхонаси билан ҳамкорликда ёшлар орасида ОИТВ/ОИТСни олдини олиш ва гиёҳванд моддаларга қарши кураш мавзусига бағишланган «Ипак йўли» радио сериали лойиҳаси муваффақиятли амалга оширилди. Ўзбекистон ЮНЕСКОнинг «Марказий Осиёда масофавий таълим» минтақавий лойиҳасида фаол қатнашиб келган.
«Ахборот барча учун» дастури
«Ахборот барча учун» дастурининг асосий мақсади - билим жамиятини барпо этиш. Ахборот ва коммуникация технологиялари (АКТ) соҳасидаги «Ахборот барча учун» дастури 2000 йилда таъсис этилган. «Ахборот барча учун» дастурининг миллий қўмитаси Ўзбекистон алоқа ва ахборотлаштириш агентлиги қошида ташкил этилди. Ўзбекистон алоқа ва ахборотлаштириш агентлиги ташаббуси асосида 2003 йилдан буён, Тошкент шаҳрида «Ахборот ва коммуникация технологиялари» мавзусидаги саммитлар ҳар йили ташкил этилмоқда. Мазкур саммитларни қўллаб-қувватлаш мақсадида 2008 йилнинг 23-24 октябр кунлари Тошкент шаҳрида «Янги рақамли технологиялар соҳасида глобал ҳамкорлик» мавзусида ЮНЕСКО форуми ташкил этилди. Форум янги рақамли технологияларнинг кенг тарқалиши, ушбу соҳада малакали кадрларни тайёрлаш масалаларига бағишланган эди. Ушбу ЮНЕСКО Форуми натижалари бўйича 2009 йилнинг 11 май куни Ўзбекистон Миллий университети ва Корея политехника университети ўртасида «Рақамли технологиялар асосида масофавий таълимни ривожлантириш» бўйича ҳамкорлик Меморандуми имзоланди.
2009 йилда ЮНЕСКО Бош директори ўринбосари таклифига биноан, Тошкент ахборот технологиялари университети ректори Москва шаҳридаги ЮНЕСКОнинг «Таълим соҳасида информатика» номли халқаро институте бошқарув кенгашига аъзо бўлди.