Эгамбердиева Т

«Шарқ тароналари» халқаро мусиқа фестивали
Ўзбекистон Республикаси Президенти Ислом Каримов ташаббусига биноан, «Шарқ тароналари» халқаро мусиқа фестивали 1997 йилдан буён ҳар икки йил ЮНЕСКО раҳнамолигида Самарқанд шаҳрида ўтказиб келинади. Ушбу фестивал жаҳоннинг йирик маданият тадбирларидан биридир. Мусиқа фестивалининг асосий мақсадлари мумтоз мусиқа намуналарини оммавийлаштириш, халқларнинг буюк анъаналарини асраш ва келажак авлодга етказиш, халқаро маданий алоқаларни ривожлантириш ҳамда тинчлик ғояларини жаҳон миқёсида тарғиб қилишдан иборат. Шу сабабли, ЮНЕСКО ташкилоти мазкур фестивални ўз раҳнамолигига олган ва барча фестивал тадбирларида иштирок этиб келмоқда. Фестивал доирасида, ЮНЕСКО кўмагида халқаро илмий анжуманлар ташкил этиш яхши анъанага айланган.
Маданиятлараро мулоқот
1999-2007 йиллар давомида маданиятлараро ва динлараро мулоқот соҳасида илғор тажрибалар тадқиқ этилган эди. 2000 йил 13-16 сентябр кунлари Тошкент шаҳрида «Динлараро мулоқот ва тинчлик маданияти» мавзусида халқаро конгресс, 2000 йил 18 сентябр куни Бухоро шаҳрида «Суфизм ва динлараро мулоқот» мавзусида халқаро симпозиум ташкил этилди. Ушбу фаолиятнинг давоми сифатида Тошкент ислом университети қошидаги «Жаҳон динларини қиёсий тадқиқ қилиш» ЮНЕСКО кафедрасида «Диний экстремизм ва терроризмга қарши маънавият ва маърифат асослари» мавзусидаги Марказий Осиё минтақаси семинари ва ёшлар форуми ташкил этилди (2005 йил, март). Шунингдек, маданиятлараро мулоқот соҳасида қуйидаги тадбирлар ЮНЕСКО, АЙСЕСКО, Фанлар академияси, Тошкент Ислом университети, Марказий Осиё тадқиқотлари халқаро ЮНЕСКО институти (Самарқанд) ва ЮНЕСКОнинг Тошкентдаги ваколатхонаси билан ҳамкорликда амалга оширилди: «Марказий Осиёда ислом қадриятлари: бағрикенглик ва инсонпарварлик» мавзусидаги халқаро анжуман (Тошкент ш., 2007 йил 26-27 июн); «Ўзбекистоннинг ислом маданияти тараққиётида тутган ўрни» (Тошкент/Самарқанд ш., 2007 йил 14-15 август); «Марказий Осиё ва Хижоз ўртасида зиёрат йўллари» (Тошкент ш., 2007 йил 3-4 октябр)¹.