Эгамбердиева Т

БМТнинг европа иқтисодий комиссияси - БМТнинг Иқтисодий ва ижтимоий кенгашига қарашли Халқаро ташкилоти. 1946 йилда тузилган. Асосий вазифаси Европа мамлакатлари иқтисодиётини ривожлантириш, улар ўртасида иқтисодий алоқаларни мустаҳкамлаш, шунингдек Европа мамлакатлари биланбошқа қитъалардаги мамлакатлар ўртасида иқтисодий алоқаларни кенгайтиришдан иборат. Комиссиянинг олий органи - ялпи сессия; одатда, йилига бир марта чақирилади, ижроия органи - котибият. Бош қароргоҳи - Женевада (Швейцария).
БМТнинг тизими - БMT Уставига мувофиқ унинг асосий органларини Бош Ассамблея, Хавфсизлик Кенгаши, Иқтисодий ва ижтимоий кенгаш, Васийлик кенгаши, БМТ қошидаги халқаро суд ва БМТ Котибияти ташкил этади. Бундан ташқари БМТ ўз Уставига биноан зарурат туғилган ҳолларда ёрдамчи органларни ҳам таъсис этиш ҳуқуқига эга.
БМТнинг инсон ҳуқуқлари бўйича комиссияси - БМТ иқтисодий-ижтимоий Кенгашининг ёрдамчи органи. Комиссия таркибига 1946 йилнинг 15 февралида тузилган иқтисодий-ижтимоий Кенгаш сессиясида 3 йил муддатга сайланувчи вакиллари кирадилар. Комиссия БМТ Низоми тамойилларига қатъий амал қилиш асосида Инсон ҳуқуқларини ҳурмат қилишни ривожлантириш ва қўллаб-қувватлаш мақсадида ҳамкорлик масалалари биланшуғулланиш кўзда тутилган. Комиссиянинг энг муҳим вазифаси Инсон ҳуқуқлари ва эркинликларининг қўпол ва оммавий равишда бузишга қарши курашишдир. Комиссиянинг фаолиятига иқтисодий-ижтимоий Кенгаш ва БМТ Бош Ассамблеясига Инсон ҳуқуқлари ҳимояси, масалалари бўйича тавсиялар ва маърузалар тақдим этиш, шунингдек, шу соҳага тегишли бўлган Халқаро конвенциялар учун лойиҳалар тайёрлаш киради. Хусусан, 1948 йилда комиссия Инсон ҳуқуқлари бўйича умумий Декларация тайёрлаган, 1966 йил Инсон ҳуқуқлари ҳақидаги пактларни тайёрлашда иштирок этган, 1973 йил Апартеид жиноятларини тўхтатиш ва уни жазолаш бўйича конвенция ва бошқалар. Комиссиянинг йиғилишлари Женевада (Швейцарияда) бўлиб ўтади.
БМТнинг инсонни рағбатлантириш ва унинг барча ҳуқуқларини ҳимоя қилиш бўйича олий комиссари - БМТ Бош Котибига бўйсунади ва барча инсонларнинг фуқаролик, иқтисодий, ижтимоий, сиёсий ва маданий ҳуқуқларини рағбатлантиришни, ҳимоя қилишни самарали рўёбга чиқариш йўлида фаолият олиб боради. Унинг вазифасига 1) инсон ҳуқуқлари ҳақидаги мавжуд механизмларни мустаҳкамлаш ва яхшилаш; 2) инсон ҳуқуқларини таъминлаш мақсадида барча ҳукуматлар биланмулоқотга киришиш, 3) БМТнинг барча тизимларида инсон ҳуқуқларини рағбатлантириш ва ҳимоя қилиш фаолиятини координациялаш киради. Олий Комисар мартабаси БМТ Бош Ассамблеяси томонидан 4 йил муддатга тайинланади ва лавозимига кўра БМТ Бош котиби ўринбосари ҳисобланади. Штаб-квартираси Женевада (Швейцария).