Э. ҚОсимов, М. Aкбaров пaрдозбоп қурилиш aшёлaри

Органосиликат бўёқлар ва оксидларни кремнеорганик (КО) полимерлар билан обдан аралаштириб олинади. Бундай бўёқлар темир, бетон, шиша, ғишт, сопол ва цементли сувоқ юзалари би­лан яхши ёпишади. Органосиликат бўёқ қуруқ юзага ишлатилади ва сувоқ пардозлангандан кейин иссиққа, қуёш нурига, намга ва бошқа зарарли моддалар таъсирларига чидамлилиги ошади. Саноатда бундай бўёқлар ҳар хил рангларда ишлаб чиқарилади. Бўёқни тайёрлаганда унга қотирувчи модда қўшилади. Янги тайёрланган бўёқда 24 соатдан 40 соатгача муддатда ишлатиш керак. Қуриши — 30 дақиқа. Бўёқни ювиш ёки нам ҳолатда артиб тозалаш мумкин.
КО полимер эмали — КО лакни, кимёвий реакцияни секин­лаштирувчи, ҳар хил рангли ингибитор пигментлар билан обдан аралаштириб олинади. Унинг қуюқ-суюқлиги ВЗ-4 асбобининг тешигидан (диаметри 4 мм) ўтказганда 40-60 сония вақт кетади, яъни сувга нисбатан 4-5 марта қуюқ дегани. Ранги кўк, 15 дақиқада қурийди, 24 соат давомида сув шимувчанлиги 0,4% дан ошмайди. Эмални темир юзасини ёнувчанлиги 170 г/см², бетонники эса 250-300 г/см² га тенг.
КО эмал таркибида ингибитор пигментлар темир ёки цементли сувоқлар юзасига суртилгандан кейин, об-ҳавонинг таъсирида тезлашадиган бузувчи кимёвий реакцияни (занглаш, нураш ва ҳ.к.) секинлаштиради, сувга ва бошқа зарарли муҳитда чидамлилигини оширади. КО эмали суртилган қатлам 60 марта қуритиб ва намланганда унда бузилиш нуқсонлари бўлмайди. Ишлатиш учун қулай суюқликдаги КО эмалини олишда унга солвент ёки 1:4 нисбатда спирт-толуол эритмаларини қўллаш мумкин. Бир метр юзага КО эмал харажати: темир бўлса — 200, бетон юзага 400 г кетади.
Намланмайдиган сувли полимер бўёқлар

Ҳозирги вақтда бино ва иншоотларни пардозлашда, таъмирлашда полимер таркибли намланмайдиган бўёқлар ҳамда бўёқли бўтқалар кенг ишлатилмоқда. Жумладан, полимер оҳак, полимер оҳак цементли бўтқа шпатлевкаси каби пардозлаш ашёлари ўзларининг об-ҳаво таъсирига чидамлилиги, нам шароитда бузил­маслиги, инсон саломатлигига зарарсизлиги билан бошқа бўёқлардан афзалдир. Шунингдек, бундай бўёқларга қимматбаҳо оқ рангли пигментларни (рух оксиди, метапон ва ҳ.к.) ишлатиш эҳтиёжи қолмайди. Намланмаслик хусусияти уни янги сувоқ юзасини ҳам пардозлаш имкониятини туғдиради.