ПВA эмулсияли бўёқлар паста тарзида чиқарилади. Улар бўяш учун яроқли консистенсия ҳосил бўлгунча сув қўшиб суюлтирилади. Бу бўёқлар ички бўёқ ишларида ёғоч-тахта, ғишт ва бетон юзаларини бўяш учун ишлатилади. Aммо улардан фасадларни бўяш учун ҳам фойдаланиш мумкин. Бўёқларни юзага мўйқалам ёки пуркагич ёрдамида суриш мумкин.
Полистирол бўёқлар фасадларни бўяш учун чиқарилган 10 % ли лакдан, лак эса полистиролнинг тошкўмир солвентидаги ёки ксилолдаги эритмаси ва пигментлардан иборатдир. Фасадларни бўяш учун бўёқлар билан бир қаторда фасадга грунтовка бериш учун 5 % ли лак, шпаклёвка қилиш учун 15 % ли полистиролли лак билан бўрдан иборат аралашма ҳам чиқарилади. Полистиролли бўёқлар 3-4 соат ичида қотади. Бу хил бўёқлар билан ёзда ҳам, қишда ҳам бўяш мумкин.
Aлкид-стиролли эмаллар — ёғоч-тахта ва тайёрланган сувоқ юзаларини бўяш учун ишлатилади. СЭМ эмалларга қараганда анча ялтироқ ва механик жиҳатдан анча пишиқ бўёқ қоплама ҳосил қилади.
Нитробўёқлар ташқи ва ички бўёқ ишларида грунтовка берилган темир, ёғоч-тахта ва сувоқ юзаларини бўяш учун ишлатилади.
Нитроемал — нитроцеллулоза ва смоланинг учувчан органик эритувчилардаги эритмаларидан иборат. Унга пигментлар ва пластификаторлар қўшилган бўлади. Нитроемаллар ташқи муҳит таъсирида бўлмаган ёғоч-тахта ва грунтовка берилган темир юзаларни бўяш учун ишлатилади. Зарур бўлганда нитроемалларни ишлатиш олдидан уларга суюлтирувчи қўшиб бўяш учун яроқли қовушқоқликка келтирилади. Эмаллар юзага пуркаш йўли билан берилади.
Бўялган юза қотгандан кейин, бир хил рангли, ярим ялтироқ бўлиши, унда доғ пуфакчалар, нуқталар, ёмон суртилган пигмент излари бўлмаслиги керак. Нитроемал тўла қотиши учун кетадиган вақт 1 соатдан ошиқ бўлмаслиги лозим.
Эмулсияли бўёқлар. Полимерли сув (полимер эмулсияси) билан пигментларни қориштириб тайёрланган эмулсияли бўёқлар қурилишда жуда кўп ишлатилмоқда. Шулардан айримлари қуйидагилар:
ПВA смоласидан тайёрланган эмулсияни пигментлар билан қориштириб олинган бўёқлар. Бўёқ парда мўрт бўлмаслиги учун эмулсияга пластификатор дибутилфтолат қўшилади. Бу турдаги бўёқлар заводдан қурилишга қуюқ бўтқасимон ҳолатда келтирилади ва сув билан суюлтириб ишлатилади. Улар бинонинг ички ва ташқи қисмидаги бетон, сувоқ ва ёғоч юзаларини бўяш учун ишлатилади.
Худди шу турдаги, аммо бутадиен стирол смоласи асосида ишланадиган пигмент ва латексли СКС-65 маркали полимер бўёқлар ҳам қурилишда кўплаб ишлатилади.