Davlat va huquq nazariyasidan mantiqiy savollarga javoblar

Ички функциялар давлатнинг ички вазифаларини ечишга йўналтирилган фаолият бўлиб, давлатнинг жамиятга таъсирининг фаоллик даражасини кўрсатади. Ташқи функциялар эса халқаро-ҳуқуқий муносабатларнинг субъекти сифатида иштирок этаётган давлат, давлатлараро миқёсдаги вазифаларни хал қилиш билан боғлиқдир.
Давлатнинг асосий ички функцияларига қуйидагиларни киритиш мумкин:

• 
  иқтисодий функция;
  
• 
  ижтимоий функция;
  
• 
  сиёсий функция;
  
• 
  ҳуқуқий тартиботни таъминлаш функцияси;
  
• 
  тинчлик ва тотувликни таъминлаш функцияси;
  
• 
  экологик функция ва бошқа функциялар.
  

Иқтисодий функция - бу давлат томонидан иқтисодиётни ривожлантириш борасида асосий йўналишларини ишлаб чиқиш, бошқарувни амалга ошириш ҳамда тартибга солиб туришдан иборатдир. Бундан ташқари, давлат бюджетини шакллантириш, жамиятнинг иқтисодий ривожланиш стратегиясини аниқлаш, турли хил мулк шаклларини тенглик шароитида амал қилинишини таъминлаш, тадбиркорлик фаолиятини қўллаб қувватлаш кабилар ҳам давлатнинг иқтисодий соҳадаги функцияси доирасига киради.
Ижтимоий функция - бу аҳолини ижтимоий ҳимоя қилиш, ижтимоий тенгсизликни камайтириш, инсонларга муносиб турмуш тарзини яратиш, таълим соҳасини, соғлиқни сақлаш ва маданиятни ривожлантириш ва б.
Сиёсий функция - бу давлатнинг (жамиятнинг) сиёсий ҳаётини бошқариш, давлат органларини шакллантириш ҳамда уларнинг фаолиятини ташкил этишдан иборат.
Ҳуқуқий тартиботни муҳофаза қилиш функцияси- давлатнинг жамиятда қонунийлик ва ҳуқуқий тартиботни мустаҳкамлаш, инсон ва фуқароларнинг ҳуқуқ ва манфаатларини ҳимоя қилиш кабиларга қаратилган бўлади.
Тинчлик ва тотувликни таъминлаш функцияси -бу давлат томонидан аҳолининг тинч-тотув яшаши учун зарур шарт-шароитларни яратиб бериш, турли миллатларни ва ижтимоий гуруҳларни муросаи мудорада сақлаб туришдан, уларнинг орасида келиб чиқиши мумкин бўлган низоларнинг олдини олиш ҳамда бартараф этишдан иборат.