Давлат фуқаролик хизматини ўташ тартиби тўғрисида низом

Давлат фуқаролик хизматини ўташ тартиби тўғрисида

НИЗОМ
1-боб. Умумий қоидалар
1. Ушбу Низом давлат фуқаролик хизматининг ташкилий-ҳуқуқий механизмларини, давлат фуқаролик хизматчиларининг ҳуқуқий мақоми, ҳуқуқлари, мажбуриятлари ва жавобгарлигини, шунингдек, хизматга қабул қилиш ва давлат фуқаролик хизматига ўтиш тартибини белгилайди.
2. Давлат фуқаролик хизмати – давлат фуқаролик хизмати лавозимлари Давлат реестерига киритилган лавозимларда оммавий манфаатлар учун давлат лавозимида Ўзбекистон Республикаси фуқаролари томонидан амалга ошираладиган ҳақ тўланадиган профессионал фаолият ҳисобланади.
3. Ўзбекистон Республикасида давлат хизмати, фаолиятни амалга ошириш соҳаси, тармоқ ва органлардан (ташкилотлардан) қатъи назар ягона ҳисобланади. Ўзбекистон Республикаси давлат хизматининг ягоналиги давлат хизмати ишлари соҳасидаги давлат бошқарувининг марказлаштирилган ташкилий-ҳуқуқий механизмлари ҳамда давлат хизматчисининг ягона ҳуқуқий мақоми орқали таъминланади.
Давлат фуқаролик хизмати Ўзбекистон Республикаси Конституцияси

ва қонунларига, Ўзбекистон Республикаси Олий Мажлис палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, ушбу Низомга ва бошқа қонун ҳужжатларига қатъий мувофиқ равишда амалга оширилиши керак.

4. Ушбу Низом Ўзбекистон Республикаси Президенти, Ўзбекистон Республикаси Олий Мажлисининг Қонунчилик палатаси депутатлари ва Сенати аъзолари, Қорақалпоғистон Республикаси Жўқорғы Кенгесидаги депутатлари, Ўзбекистон Республикаси Вазирлар Маҳкамаси аъзолари, давлат ҳокимияти вакиллик органларининг раиси ва аъзолари, шунингдек судялардан ташқари барча Ўзбекистон Республикаси давлат хизматчиларга татбиқ этилади.
Мазкур Низомнинг манфаатлар тўқнашуви, ахлоқ-одоб қоидалари,

даромадлар, йирик харажатлар ва мулк декларациясига оид қоидалари Ўзбекистон Республикаси Вазирлар Маҳкамаси аъзоларига, жойлардаги давлат ҳокимияти вакиллик органларининг раиси ва аъзоларига нисбатан ҳам тадбиқ этилади.

Ўзбекистон Республикаси Қуролли Кучларидаги ҳарбий хизмат

ва ҳуқуқни муҳофаза қилувчи органлардаги хизмат давлатнинг махсус хизмати ҳисобланади ва алоҳида қонун ҳужжатлари билан тартибга солинади.