Дала экинларининг асосий зараркунандалари

Ҳаёт кечириши. Бу зараркунанданинг ҳаёт кечириши ҳозирча яхши текширилган эмас. Қалқондор шоли майсаларини ҳамда ҳар хил чувалчанг ва майда балиқларни еб кун кечиради. Бунинг шоли майсасини еб зиён етказишидан кўра, тез ҳаракат қилиб шоли илдизларини узиб юбориши билан етказадиган зарари каттароқ бўлади; бунда шикастланган ўсимлик сув бетига қалқиб чиқиб ҳалок бўлади. Айниқса, кечикиб экилган шолилар иккита-учта илдиз чиқарган вақтида бу зараркунандадан кўп шикастланади. Яхши ўсиб бақувватлашиб олган шолилар бу зараркунандадан деярли шикастланмайди.
Қалқондор оқмайдиган ёки секин оқадиган сувларда ўзини яхши ҳис қилиб тез кўпаяди; бунинг серҳаракатлиги кечаси сусаяди; аммо куннинг иккинчи ярмида у жуда фаол ҳаракат қилади; баъзан сув тагига тушиб анча вақтгача балчиққа кўмилиб ётади. Бу зараркунанданинг урғочиси июн ойининг ўрталарида тухум қўяди; бунинг тухум халтасида 77 дан 110 тагача тухум бўлади. Тухумини куннинг иккинчи ярмида тупроқда 3 см гача чуқурликка 27 тадан тўп-тўп қилиб қўяди. Apus авлодининг турларида эркаги кам учрайди; уруғланмаган тухумлари эса партеногенетик ривожланиш қобилиятига эга. Қалқондор тухуми ҳовузнинг суви қуригач бир неча ойгача тирик қолади.
Кураш чоралари. Шоли майсасини калқондорнинг зарарлашидан сақлаш учун уруғни машина билан экиш тавсия этилади, чунки шоли қўлда сочиб экилса майсаларининг илдизлари ер юзасида бўлиб, буни зараркунанда осонгина узиб шикастлайди. Қалқондор билан зарарланган участкаларга шолининг сув бостирилмасдан ўстириладаган навларини экиш ва уруғни сув қўймасдан сочиш керак Шу билан бирга сувнинг шолипояга кирадиган жойига кўзи 5—6 мм ли сим тўр тутиб қўйиш тавсия этилади. Шолипояда алмашлаб экиш усулини амалга ошириш ҳам жуда фойдали тадбир ҳисобланади.
Шолипоянинг ҳар гектарига (суви 5—10 см қалинликда бўлган вақтда) 2 ц дан аммиак селитра солинганда зараркунанда батамом ҳалок бўлади; бунда шоли ўсимлиги ҳатто ёшлик вақтида ҳам селитрадан мутлақо зарарланмайди. Валенсияда қалқондорга қарши курашда аммоний сульфат ёки аммоний хлорид ишлатиш тавсия этилган (Демор).
Бундан ташқари, шолипояда карп балиғи ва ўрдак боқиш билан ҳам қалқондорлар йўқотилади.