Дала экинларининг асосий зараркунандалари

Анор тунлами
Arcyophora dentula Ld. ;синоними: Euxestis dentula Ld.
Зарари. Анор тунламининг қуртлари баргларни еб, анор тупларини қувватдан кетказади.
Тарқалиши. Анор тунлами ҳозирча фақат Бухорода, Шаҳрисабз атрофларида ва шимолий Эронда топилган.
Таърифи. Капалагининг катталиги қанотларини ёзиб турганда тахминан 21 мм келади; устки қанотлари оч қўнғир, зарғалдоқ рангли бўлиб, иккита яхши билинадиган ва битта сал-пал билинадиган кўндаланг оч сариқ чизиқлари, сарғиш-қўнғир попуги бор; орқа қанотлари ялтироқ, малла ранг бўлиб, оқ попуги бор. Кўкрагининг ранги оч қўнғир-зарғалдоқ, қорниники сарғиш-кул ранг.
Қуртининг катталиги 1,5 см чамасида, ранги сарғиш-яшил, орқасининг четларида узунасига кетган иккита сариқ йўли бор, дастлабки уч сегментида бу йўллар нуқта чизиққа ўхшаб давом этади. Ана шу йўллар орасида гунгурт оқ тусли камбар ҳошия бор. Қуртнинг икки ёнидан, стигмалар чизиғида биттадан яшил хира йўл ўтади. Оқ йўл билан сариқ йўлнинг орасида, гавданинг иккала томонида, дастлабки уч сегментда узунасига кетган сариқ нуқтали чизиқ бор; сал-пал сезиладиган сариқ пунктир ённинг хира оч яшил чизиқлари билан орқанинг сариқ чизиқлари орасида ҳам бор. Биринчи сегментда, бош чегарасида ҳар томонда учтадан қора нуқта бор.
Қуртнинг боши яшил, юқори ва икки ён томондан сариқ чизиқ билан ўралган. Энсада, шу чизиқнинг юқорисида, бошнинг икки ёнида эса-ўша чизиқнинг пастида худди шундай кенгликдаги гунафша ҳошия бор. Иккала кўзининг пастида тўрттадан қора нуқта бўлади.
Қурт сийрак оч туклар билан қопланган. Бошидаги туклар узунроқ бўлади, шунингдек олдинги учта ва кейинги иккита сегментдаги туклар ҳам узунроқдир, гавдасининг олдинги томони кенгроқ.
Ёш қурт оч яшил, бир хил рангли бўлиб, бошида яққол бўртиб турган ярим доира қора нуқталари бор. Fумбаги шохларга ёпишган чўзиқ зич пилланинг ичида туради. Анор тунламининг ҳаёт кечириши ҳозирча текширилган эмас. Июлнинг иккинчи ярмида капалаклар кўплаб пайдо бўлади ва тунлам шу даврда кўпроқ зарар етказади.