Bulardan tashqari, tovush o'zgarishlarining yana quyidagi ko’rinishlari mavjud

Ko‘makchili qurilmalar yordamida ergashgan qo‘shma gaplar
Bilib oling. Bosh gapda ifodalangan mazmunning sababini bildiruvchi ergash gaplar bosh gapga shuning uchun, shu sababli, shu bois(dan),shu tufayli singari ko‘makchili qurilmalar vositasida bog‘lanadi. Ular bosh gap tarkibida keladi. Yozi bilan tinimsiz mehnat qildik, shu sababli mo‘l hosil oldik. (Olimjon Xoldor). Zinnatullinning ishi shoshqich emas, shu bois ikkinchi hukm unga nasib etdi. (T.Malik)
Deb so‘zi yordamida ergashgan qo‘shma gaplar
Bilib oling. Bosh gapda ifodalangan mazmunning maqsadini, sababini bildiruvchi ergash gaplar bosh gapga ko‘pincha deb so‘zi yordamida bog‘lanadi. Ergash gaplarning kesimi buyruq va shart maylidagi, shuningdek, kelasi zamon fe’llari bilan ifodalanganda, asosan, maqsad ma’nosi, o‘tgan zamon fe’llari bilan ifodalanganda esa, ko‘proq sabab ma’nosi anglashiladi. Ukalarim bezovta bo‘lmasin deb, To‘ng‘ich botir to‘qayning bir chekkasiga qochdi. (“Uch og‘a-ini botirlar”).
Shart mayli vositasida ergashgan qo‘shma gaplar
Bilib oling. Ergash gapning kesimi shart mayli shaklidagi fe’llar orqali ifodalanganda, shart mayli qo‘shimchasi ergash gapni bosh gapga bog‘lovchi vosita ham sanaladi. Bunday ergash gaplar bosh gapda ifodalangan mazmunning yuzaga chiqish yoki chiqmaslik shartini, paytini bildiradi. Yozuvda ergash gap bosh gapdan vergul bilan ajratiladi. Yerga mehringni bersang, u senga rizq beradi, seni to‘ydiradi. (E. Samandar)Bola o‘qisa, foydasi o‘ziga, keyin ota-onasiga tegadi. (O.)
Ko‘rsatish olmoshili ergashgan qo‘shma gaplar
Bilib oling. Bosh gap tarkibidagi ko‘rsatish olmoshi ma’nosini izohlash uchun qo‘llangan ergash gaplar bosh gapga –ki yuklamasi yordamida bog‘lanadi. Bu yuklama bosh gap kesimi tarkibida bo‘ladi va ergash gap bosh gapdan vergul bilan ajratiladi.
Ba’zan bu bo‘lak qo‘llanmasligi ham mumkin, ammo uning o‘rni bilinib turadi. Shuni doimo yodingda tutki, biz hammamiz seni yaxshi ko‘ramiz. (Parda Tursun) Alam qiladigan yeri shuki, bu qo‘rg‘onni ko‘z oldimizda tiklashdi. (T.Malik)