Bulardan tashqari, tovush o'zgarishlarining yana quyidagi ko’rinishlari mavjud

Nisbat va bo‘lishsizlik shakllari yetakchi fe’l tarkibida ham, ko‘makchi fe’l tarkibida ham kelishi mumkin. Zamon, shaxs-son qo‘shimchalari, fe’lning vazifa shakllari faqat ko‘makchi fe’llarga qo‘shiladi.
Eslatma: Ko‘makchi fe’lli so‘z qo‘shilmalarida o‘zlik nisbat qo‘shimchalari faqat yetakchi fe’lga qo‘shiladi: boshlanib ketdi. Majhul nisbat qo‘shimchalari ko‘pincha ko‘makchi fe’lga qo‘shiladi: sotib yuborildi. Orttirma nisbat qo‘shimchasi asosan yetakchi fe’lga qo‘shiladi: ko‘rsatib yubordi. Birgalik nisbat qo‘shimchasi esa yetakchi fe’lga ham, ko‘makchi fe’lga ham qo‘shilaveradi: ko‘tarishib bordi - ko‘tarib borishdi.
AL va KHK darsligidan:
Ishlab chiqdi, ishlab bo‘ldi, ishlay boshladi, ishlab yuribdi, ishlab qo‘ydi, ishlab yubordi, ishlab yozdi, ishlab turibdi, ishlab ko‘rdi singari so‘zlarga e’tibor bersangiz, ularning hammasi bir umumiy ma’noni – “ishlamoq” ma’nosini ifodalaydi. Bu ma’no, asosan, ravishdosh shaklidagi birinchi qismdan anglashiladi. Ikkinchi qism esa birinchi qismdan anglashilgan leksik ma’noga turli qo‘shimcha ma’nolarni (harakatning boshlanishi, davomiyligi, tugallanishi, oson bajarilganligi, tez bajarilganligi, harakatni bajarishga uringanligi kabi) ma’nolarni yuklaydi.
Bunday so‘zlar ham tuzilishiga ko‘ra, fe’l+fe’l tarzida bo‘ladi. Birinchi fe’l so‘zning asosiy leksik ma’nosini ifodalaydi. Shuning uchun u yetakchi fe’l sanaladi. Ikkinchi qismi esa birinchi qismga (yetakchi fe’lga) qo‘shilib, unga turli xil qo‘shimcha ma’nolarni yuklaydi, lekin yetakchi fe’lning leksik ma’nosini o‘zgartirib yubormaydi.
Undan yangi fe’l hosil bo‘lmaydi. Shuning uchun bunday fe’llarga ko‘makchi fe’llar deyiladi.
Shuni ta’kidlash kerakki, faqat ko‘makchi fe’l vazifasini bajaruvchi alohida fe’llar mavjud emas. Bir qator mustaqil fe’llar yetakchi fe’lga qo‘shilganda ko‘makchi fe’l vazifasida keladi.
Ularga quyidagilar kiradi: boshla, yot, tur, bor, o‘tir, bo‘l, bitir, bit, ol, ber, qol, qo‘y, chiq, bor, kel, ket, yubor, tashla, sol, tush, yot, qara, boq va boshqalar.
Yuqoridagi fe’llar faqat yetakchi fe’lga qo‘shilgandagina ko‘makchi fe’l vazifasida keladi. Yetakchi fe’l esa ravishdoshning –(i)b va –a, -y shakllarida bo‘ladi.
Masalan,

O‘qib	tur
	yubor
	o‘tir
	bo‘l
	ol
	ber
	qol
	chiq
	kel
	tashla
	boq
	yot

Keyingi so‘zlar ko‘makchi fe’llar bo‘lib, ular ravishdosh shaklidagi yetakchi fe’lga qo‘shilib, turli xil qo‘shimcha ma’nolarni anglatmoqda.