Бухоро давлат университети илм ва эзгулик бухоро – 2016

Ушбу сатрлар таниқли олим С.С.Бухорийнинг сўз боши билан эълон қилинган.

Шариф Баротов педагогика ва бошланғич таълим методикаси факультетини тугаллаш арафасида турибди. У факультет комсомол ташкилотининг секретари сифатида толиби илмларнинг ишончини қозонган, камтарлиги, серғайратлиги туфайли талабчан домлалар меҳрига сазовор бўлган, қунт билан шеър машқ этаётгани сабабли институтимиз поэзия шинавандалари дилини забт этгандир.

Шариф шеърлари устоз Шариф Нурхонга манзур бўлиб: “Номимнинг ҳам давоми шонимнинг ҳам давоми бўлинг, ўғлим”- деганди.
Шариф Баротов шеърлари область радиоси, “Бухоро ҳақиқати” газетаси орқали шеърхонларга маълум ва манзур. Лекин азалдан шеърият, илму-урфон ватани Бухорода шеър ёзиб, шоир бўлиб танилиш нақадар машаққат эканлигини Шариф ҳис этади. У ҳали қанча довонларни забт этиши, беҳисоб китоблар мазмунини симариши, саноқсиз тунларни тонгга улаши, беадад тўсиқларни енгиши керак.
Собит эътиқод билан, покиза ният билан, жасорат билан заҳматли йўл сафари хайрли, серсамар қутлуғ бўлғусидир.
Эътиқодинг, ниятинг, йулдошинг бўлсин, Шариф !


Ҳайкалларга қийин

Ҳайкалларга қийин бундай яшамоқ,

Турмоқ мудом бир нуқтада михланиб.
Ҳаёт узра керак ҳайқирмоқ жўшмоқ,
Қўшиқларни тингламоқ керак ёниб.
Ҳайкаллар дунёни кузатар беун,
Кўксида музлаган тилаклар билан
Қандай яшамоқда баъзилар бугун
Ҳайкал бўлиб колган юраклар билан.
***
Юлдузлар сирини айтар тунларга,
Шарпалар оҳиста тўлғонар.
Юлдузлар сирини айтар тунларга
Мусаффо тонг шошиб уйғонар.
***
Юлдузлар сирини айтар дарахтга,
Новдасини тарк этар барглар.
Илдизлар сирини айтар дарахтга,
Баҳорни уйғотар куртаклар.
Кўзлар сир бой бермай сақлайди сукут,
Жам айлаб гоҳ шодлик, гоҳ ғамни
Кўзлар сир бой бермай сақлайди сукут
Туйғуларга кўмиб оламни.
***
Баъзан келажакка мен қўйган қадам
Ҳайратда қолдирар ўтмишни бир дам.
Шу он замонамга кимдир тош отар,
Ҳайҳот! Бу тош менинг қалбимга ботар.
Инсонман – қалбимда гуллайди башар,
Қалбимда дунёнинг ташвиши яшар.

* ушбу мақола ва шеълар “Журъат” рукни остида Бухоро давлат педагогика институтининг “Илғор фан” учун (За передовую науку) № 16 ( 707) 16 июнь 1983 й.) газетасида эълон қилинган.