Boshqarish” fanining predmeti

Fermer xo‘jaligi– tanlov asosida uzoq muddatli ijaraga berilgan yer uchastkalaridan foydalangan holda, qishloq xo‘jaligi tovar ishlab chiqarishi bilan shug‘ullanuvchi, yuridik shaxs huquqlariga ega bo‘lgan mustaqil xo‘jalik yurituvchi subyektdir.
Ko‘p tarmoqli fermer xo‘jaligi – fermer xo‘jaligi tashkil etilishi paytida yer uchastkalarini uzoq muddatli ijaraga olish shartnomasida belgilangan asosiy ixtisoslashuv yo‘nalishidan boshqa sohalarda ishlab chiqarishni tashkil etib mahsulot ishlab chiqarishni yo‘lga qo‘ygan fermer xo‘jaliklari hisoblanadi. Ko‘p tarmoqli fermer xo‘jaligini tashkil etishdan ko‘zlangan asosiy maqsad bu - mavjud yer-suv, mehnat resurslari, neft mahsulotlari, mineral o‘g‘itlar, texnika vositalari, bino va inshoot kabi vositalardan unumli foydalangan holda fermer xo‘jaligining oladigan foydasi miqdorini oshirish bilan bir qatorda qo‘shimcha ish joyini tashkil etish hisoblanadi.
Ko‘p tarmoqli fermer xo‘jaligining maqsadi – qishloq xo‘jaligida asosiy tovar mahsulotlarini yetishtirish bilan birga yordamchi va qo‘shimcha hamda noqishloq tarmoqlarni rivojlantirish yo‘li bilan daromad (foyda) olish, o‘zining ijtimoiy va iqtisodiy ehtiyojlarini qondirishdir.
Ko‘p tarmoqli fermer xo‘jaligining vazifalari – ajratilgan yer va suv resurslaridan oqilona va maqsadli foydalanishni ta’minlash; tuproq unumdorligini
saqlash va oshirish hamda yerlarni muhofaza qilish; mustaqil ravishda qishloq xo‘jaligi mahsulotlari yetishtirish, ularni qayta ishlash va sotish, shuningdek, xizmatlar ko‘rsatish; veterinariya qoidalariga rioya qilgan holda, chorva mollarining mahsuldorligini oshirish; qo‘shimcha va yordamchi tarmoqlarni tashkil etish orqali o‘z faoliyatini yuritishdan iboratdir.
Ko‘p tarmoqli fermer xo‘jaligining faoliyatiga – qishloq xo‘jaligi mahsulotlarini yetishtirish; qishloq xo‘jaligi mahsulotlarini qayta ishlash, saqlash, shuningdek, bozorlarda, shu jumladan o‘z savdo shoxobchalari orqali sotish; tijorat faoliyati va marketing tadqiqotlarini tashkil qilish; yuridik va jismoniy shaxslarga pulli xizmatlar ko‘rsatish; tashqi iqtisodiy faoliyatni amalga oshirish; faoliyatning qonun hujjatlarida taqiqlanmagan boshqa noqishloq sohasini qo‘shib olib borish bo‘yicha tadbirkorlik faoliyatini amalga oshirishdir.