Berdaq atinda

PULICISTIKALIQ STIL tildiń jámiyetlik tásir etiw funkciyasın iske asıradı. Qanday da bir maǵlıwmatlar beriw menen birge publicistikalıq stil tıńlawshınıń (oqıwshınıń) sezimine de tásir etedi.
Bul stil jámiyettegi siyasiy-ideologiyalıq qatnaslardı bildiredi. Sonlıqtan da ol kúndelikli baspa sózde (gazeta hám jurnallarda) radio hám televideniede paydalanıladı.
Publicistikalıq stil awızeki hám jazba túrde de paydalanıladı. Onıń janrlarına advokatlardıń, sheshenlerdiń shıǵıp sóylewleri, baspasózlerdegi maqalalar, reportajlar kiredi. Advokat, propagandist hám agitatorlardıń shıǵıp sóylewleri awızsha boladı, biraq olardıń sóylewi ádebiy til normalarına baǵınadı.
Publicistikalıq stilde
1. Jámiyetlik siyasiy leksika úlken orın iyeleydi. Mısalı jámiyet, puxara, menshik, ekonomikalıq, jetiskenlikler, konstituciya, Ana-Watan hám t.b.
2. Abstrakt atlıqlar keń qollanıladı hújjet, mártlik, nátiyjelilik, sadıqlıq, kelisim, juwapkershilik hám t.b.
3. Tásirsheńligi kúshli ekonomikalıq mánidegi sózler paydalanıladı. Mısalı Suwdıń da sorawı bar (Erkin Qaraqalpaqstan)
4. Qospalanǵan gápler (birgelikli aǵzalar, kiris sózler hám gápler, qaratpalar, feyil formaları) keń qollanıladı. Mısalı Haqıyqatında da, jaslıǵında miynet etken, urısta qan keshken, sawashlarda bolǵan, tılda awır miynet etken, nuraniy ata hám apalarımız jaslıǵındaǵı miynetleriniń ráhátin tatatuǵın máwritler jetti (Erkin Qaraqalpaqstan).
5. Tildiń kórkemlew qurallarınan paydalanıladı. Mısalı Bárekella, Qaraózekli suńqarlar (Erkin Qaraqalpaqstan).
6. Publicistitkalıq stilde hár qıylı stildiń birlikleri aralasıp qollanıla beredi (kórkem ádebiyat stiline, ilimiy stilge tán sózler, sóylew stiliniń elementleri hám t.b.).
Gazeta stili. Publicistikalıq stilde gazeta stili ayrıqsha orın iyeleydi. Ol agitaciyalıq hám propagandistlik sıpatqa iye boladı. Gazeta stilinde gazetanıń bas maqalaları, reportajlar, xalıqaralıq awhal, sport jańalıqları, feletonlar jazıladı hám bul stildiń ózine tán standart birlikleri boladı. Mısalı Joqarı sheshim, úlken úles, qızǵın juwap hám t.b.
Bunday shtamp sózler (bir formada qáliplesip turaqlasqan sózler hám sóz dizbekleri) gazeta stilin sıpatlaydı, biraq olardıń orınsız jiyi qollanıla beriwin durıs dep esaplawǵa bolmaydı.