Berdaq atinda

Is qaǵazların júrgiziw - hújjetlestiriw hám hújjetlestiriwdi támiyinlew teoriyası hám ámeliyatı menen tanıstırıwshı pán.
Hújjetlestiriw - bul hújjetlerdi dúziw bolıp esaplanadı. Olarda mekemeniń xızmeti, basqarıw jumıslarınıń mazmunı anıq sáwlelendiriledi.
Hújjetlerdi támiynlew - bul mekeme tárepinen dúzilgen hám sırttan alınǵan tayar hújjetler menen jumıs alıp barıw bolıp tabıladı qabıllaw, bólistiriw, dizimge alıw, toltırıw, orınlanıwın qadaǵalaw, is qaǵazların toltırıw, hújjetlik materiallardı arxivte saqlawǵa hám ilimiy, tariyxıy maqsetlerde paydalanıwǵa tayarlaw.
Hújjetler jumıs babındaǵı hám Jeke hújjetler bolıp ekige bólinedi.
Xızmet babındaǵı hújjetler mekemelerdiń, shólkemlerdiń, kárxanalardıń yamasa lawazımdaǵı adamlardıń atınan jazıladı.
Jeke hújjetlerge ayırım puqaralar tárepinen dúzilgen hújjetler jatadı arza, ómirbayan, isenim xat, tilxat, usınıs hám t.b.
Jeke hújjetlerdiń avtorı bolıp onı dúziwshiniń ózi esaplanadı. Ol hújjettiń mazmunın hám formasın anıqlap beredi.


Ómirbayan - belgili bir adamnıń ózi haqqında bayanlaǵan jazıwı. Onda avtor óziniń Jeke ómiri hám xızmeti haqqında xronologiyalıq tártipte erkin bayanlap beredi. Biraq, hújjet ıqtıyarlı túrde dúzilse de, ómirbayanda ayırım bólimlerdiń bolıwı shárt.
Ómirbayannıń tiykarǵı zárúrli bólimleri
1) Hújjettiń atı (Ómirbayan)
2) Tekst:
a) avtordıń familiyası, ismi hám ákesiniń atı~
b) tuwılǵan jılı, kúni, ayı hám tuwılǵan jeri~
v) milleti, sociallıq shıǵısı~
g) ata-anası haqqında qısqasha maǵlıwmat (familiyası, ismi, jumıs ornı)~
d) maǵlıwmatı (qay jerlerde, qanday oqıw ornın pitkergenligi hám maǵlıwmatına sáykes qánigeligi)~
e) islegen xızmetleriniń túrleri~
j) keyingi jumıs ornı hám lawazımı~
z) jámiyetlik jumıslarǵa qatnası~
i) xojalıq awhalı hám shańaraq aǵzaları~
y) turatuǵın jeri (mákan jayı), telefonı~
3. Sáne.
4. Qolı.

Ómirbayan ápiwayı qaǵazǵa, ayırım jaǵdaylarda, máselen, oqıwǵa kiriwde arnawlı baspa is qaǵazlarına qoldan jazıladı. Tekstti bayan etiw túri gúrriń usılında bolıp, birinshi bettegi sóylewshi tilinen jazıladı.

Arza - belgili bir mekeme yamasa kárxana baslıǵı atına qanday da bir másele yaki jumıs tuwralı ótinish, usınıs yamasa shaǵım túrinde jazılatuǵın rásmiy hújjet. Arza kúndelikli turmısta eń kóp qollanılatuǵın hám keń tarqalǵan is qaǵazı bolıp esaplanadı.
Arza, tiykarınan, arza jazıwshınıń óz qolı menen jazıladı hám ol anıq, qısqa hám túsinikli bolıwı kerek. Geyde arzalar jámáát yamasa bir topar adamlar atınan da jazılıwı múmkin.
Arza óziniń ulıwma zárúrli bólimlerine iye hám ol sol bólimlerdiń izbe-izligi tiykarında dúziledi.
1. Arza beriletuǵın mekemeniń yamasa kárxananıń atı hám onıń baslıǵınıń ismi, ákesiniń atı, familiyası.
2. Arza jazıwshınıń mákan jayı yamasa jumıs ornı, lawazımı, ismi, ákesiniń atı hám familiyası.
3. Hújjettiń atı (Arza).
4. Arzanıń mazmunı (usınıs, ótinish, shaǵım).
5. Arzaǵa qosımsha kirgiziletuǵın hújjetlerdiń atı (eger olar zárúrli dep tabılsa).
6. Arza jazıwshınıń qolı, ismi, ákesiniń atı hám familiyası.
7. Arza jazılǵan waqıt (jıl, kún, ay).
8. Қолы

Úlgi	Berdaq atındaǵı Qaraqalpaq mámleketlik universiteti Texnika fakulteti dekanı K.Nurpolatovqa I elektrenergetika tálimi qánigeligi studenti Embergenov Anvardan

arza
Sizden usı qısqı sessiyaǵa oqıwǵa rayonnan kelgenimdi esapqa alıp, studentler úyinen maǵan orın beriwińizdi soranaman.
2006-jıl 25-yanvar (qolı) A.Embergenov