Баҳодир эгам

ҚИЗУ ЎҒЛОНЛАРИМ 

Мева берди мен ўстирган ниҳолларим,

Бўйимга тенг бўлди қизу ўғлонларим.
Саломатлик, умр бергин эй, Оллоҳим,
Улар билан сурай давру давронларим.

Дийдорлашиб, суҳбатидан тўймайман ҳеч,

Дуоларин қилиб турай эрта-ю кеч,
Мадад бўлиб ёнларида яйраб юрай,
Шундай қутлуғ иқболимдан айирма ҳеч.

Фарзанд бердинг фаросату ақли билан,

Маърифату шижоати, шаҳди билан.
Бундан ортиқ сендан ҳеч не сўрамайман,
Кўзларимни қувонтирдинг бахти билан.

Оқибату меҳру шафқат бобо мерос,

Эътиқоду иймон, раҳмат ўзбекка хос.
Марҳаматинг дариғ тутма, ўзинг асра,
Бахтли юртда яшамоқлик қанчалар соз!


НАБИРАЛАРИМГА
Тили бийрон, кўзи жайрон барноларим,
Ҳар саволга жавоб излар доноларим.

Кўзи шаҳло, қоши қаро зеболарим,

Йўқдир сизсиз келажагу дунёларим.

Сиз- эртамсиз, сиз – бахтимсиз, иқболимсиз,

Кўзларимни қувонтирган билолимсиз.

Гоҳ ўрисча, гоҳ инглизча сўзлашасиз,

Доно тенгдош дўстингиз-ла бўйлашасиз.
Ҳаётимга маза берган Сиз болимсиз,
Кўзларимни қувонтирган билолимсиз.

Ота-онанг сизлар учун чекар заҳмат,

Сиз уларга содиқ бўлиб, айтинг раҳмат.

Улар асли раҳнамонгиз, тожу давлат,

Содиқ бўлиб, бир умрга қилинг хизмат.

Юртбоши-ю Ватан сизни қўллагайдир,

Устозингиз маърифатга йўллагайдир,

Сиз туфайли она Ватан гуллагайдир,

Сиз- эртамсиз, сиз – бахтимсиз, иқболимсиз,
Бувингизнинг эркатойи – билолимсиз!


КЕЛИНЛАРИМГА ГАП ЙЎҚ

Келин қилдим, соз бўлди,

Машаққатим оз бўлди,
Қишим мисли ёз бўлди,
Келинларимга гап йўқ!
Келин – қизим, ўз қизим,
Хушрўй, қора кўз қизим,
Ҳалим, ширинсўз қизим,
Келинларимга гап йўқ!
Туртқиламас бир-бирин,
Олиб чиқмас уй сирин,
Қўллари бирам ширин,
Келинларимга гап йўқ!
Уйи-жойига қараб,
Боласин ювиб, тараб,
Шу орада менинг ҳам
Турар коримга яраб,
Келинларимга гап йўқ!

Қулоқ тутар сўзимга,

Сапчимайди юзимга,
Қараб турар кўзимга,
Келинларимга гап йўқ!

Томорқа-ю молу жон,

Кун ора келар меҳмон,
Кўнгли очиқ, меҳрибон
Келинларимга гап йўқ!

Кўз тегмасин илоҳим,

Сўз тегмасин илоҳим,
Қўлим дуода доим:
Келинларимга гап йўқ!