Baliq kasalliklari fanidan ma’ruzalar to’plami termiz- 2021

BALIQ KASALLIKLARI FANIDAN MA’RUZALAR TO’PLAMI

Termiz- 2021

1. 
   MAVZU: BALIQLAR KASALLIKLARI FANIGA KIRISH. FANNING MAQSAD VA VAZIFALARI
   

Режа

1. 
   Kirish. Fanning maqsad va vazifalari.
   
2. 
   Baliq kasalliklari fanining boshqa fanlar bilan bog’liqligi.
   
3. 
   Baliq kasalliklari fanining ahamiyati.
   
4. 
   Baliq kasalliklari fanining yutuqlari.
   
5. 
   Patologiya asoslari va “kasallik” tushunchasi.
   
6. 
   Epizootologiya asoslari.
   
7. 
   O’zbekiston suv havzalari baliqlar parazitofaunasi va uni o’rgangan olimlar.
   

Tayanch iboralar: ixtiopatologiya, epizootologiya, parazitofauna.
Kirish. Baliqlar kasalliklari haqidagi fan – ixtiopatologiya (grek tilida «ixtis» – baliq, «patos» – kasallik va «logos» – ta’limot so’zlaridan olingan) XIX va XX asrlar chegarasida vujudga kelgan fan hisoblanadi. Ixtiopatologiyaning mustaqil fan sifatida ajralib chiqishi bevosita suv muhitining o’ziga xos xususiyatlari va ushbu muhitda yashovchi suv organizmlarining tashqi va ichki tuzilishi hamda ularning hayotiy funktsiyalarini batafsil o’rganish talabini yuzaga keltirgan. Baliqlar kasalliklarining (epizootiya) tarqalishi va uning sabablari, uni keltirib chiqaruvchilar xususiyatlari xam bevosita quruqlikda yashovchi hayvonlar epizootiyalari tarqalishi va sabablaridan keskin farqlanadi. Baliqlarning kushandalari va kasalliklari sanoat miqyosida ovlanuvchi baliqlarning son dinamikasidagi o’zgarishlarga keskin darajada ta’sir ko’rsatib, shu sababli ushbu holatlarni sinchiklab o’rganish jiddiy amaliy ahamiyatga ega hisoblanadi. Ixtiopatologiya ko’pincha holatlarda kasalliklarga qarshi ularning oldini olish, ya’ni profilaktika chora – tadbirlarini amalga oshirish nuqtai nazaridan ahamiyatga ega hisoblanib, bunda albatta baliqlarning hayotiga bevosita va bilvosita ta’sir ko’rsatuvchi omillar haqida batafsil ma’lumotlarga ega bo’lish talab qilinadi.