Baliq kasalliklari fanidan ma’ruzalar to’plami termiz- 2021

Baliqlarning ularning turlariga bog’liq holatda kasallanishi. SHu narsa ma’lumki, ko’pgina holatlarda faqat ayrim turdagi baliqlargina kasallanishi va bu vaqtda boshqa turdagi baliqlar kasallikka uchramasligi aniqlangan. Bu hodisaning sababi shundaki, ayrim turdagi baliqlar ma’lum bir kasallik qo’zg’atuvchilariga nisbatan to’liq qarshilik xususiyatiga ega hisoblanadi. Bu ko’rinishdagi kasallikka moyil bo’lmaslik xususiyati baliqlar organizmining morfologik va fiziologik (yoki biokimyoviy) xususiyatlari bilan bog’liq bo’lib, shu sababli bu holatga bog’liq bo’lgan turga oid immunitet tushunchasi yuzaga kelgan. Ayrim holatlarda baliq turlariga oid immunitet xususiyatidan suv xavzalarida yoppasiga tarqalgan epizootiyalarga qarshi kurash maqsadlarida foydalaniladi. Ushbu ko’rinishda, yildan yilga ma’lum bir suv xavzasi hududida cho’rtan balig’i o’lati kasalligi epizootiyasi takroriy holatlarda kuzatilganda bu suv xavzalarida sudak balig’ini ko’paytirish tavsiya qilinadi, bu baliq turi ushbu kasallik bilan deyarli umuman kasallanmaydi va bu o’z navbatida baliqchilik suv havzalaridan iqtisodiy zarar ko’rmagan holatda samarali foydalanishga olib keladi. Karp baliqlarida qizilcha kasalligining kuchli darajada takroriy ravishda suv havzalari sharoitida epizootiyasi qayd qilingan holatlarda bu kasallikka nisbatan chidamli hisoblangan karas (tovonbaliq) turini ko’paytirish tavsiya qilinadi.