B. U. Nasirov Bakalavriatning barcha yo‘nalishlarining 1-bosqich talabalari uchun

6. Mustaqil ta’lim topshiriqlarini tayyorlash usullari

Mustaqil ta’limni tashkil qilish jarayonida belgilangan mavzularning turli mazmunga va turli davrlarga oid tanlanishi muhim ahamiyat kasb etadi. Agar mustaqil ta’lim uchun topshirilgan mavzular bir xil mazmundagi (masalan, faqat siyosiy tarix yoki faqat iqtisodiy masalalar va hokazo) mavzulardan iborat bo‘lsa, talabalarning fanni faqat bir tomonlama (yoki cheklangan holdagi malum bir soha bo‘yicha) o‘rganishlariga majbur qilib qo‘yadi. Bu esa o‘z navbatida talabalarning eng avvalo tarix sohasidagi bilimlarini cheklanishiga yoki bir yoqlama bo‘lib qolishiga olib kelsa, ikkinchidan ularning tarixiy jarayonlarni o‘rganishdagi turli uslublardan foydalanmaslikka (chunki malum uslublar hamma mavzular uchun ham mos kelavermaydi) va ularni chetlab o‘tishiga olib keladi. Natijada talaba fan (kurs) yuzasidan o‘rganishi lozim bo‘lgan (ko‘zda tutilgan) barcha mavzularni o‘rganmaydi va etarli bilimga ega bo‘lmaydi.

Mustaqil ishlarni tayyorlash ko‘rinishi referat va shu mavzudagi taqdimotdir.
Talaba tomonidan mustaqil ta’lim uchun tavsiya etilgan mavzuning qay tarzda bajarilishidan (mavzudan kelib chiqqan holda) qatiy nazar, adabiyotlar va manbalar, hujjatlar va matbuot materiallarining to‘liq ro‘yxati (ishda foydalanilganlari) va qisqa tavsifi berilishi shartligi maqsadga muvofiqdir.