Б. А. Абдукаримов, А. Б. Бектемиров, М.Қ. Пардаев, Ш. С. Салимов, Э. Ш. Шавқиев, Ф. Б. Абдукаримов корхона иқтисодиёти

Биринчидан, ҳар бир корхонанинг иқтисодий хавфсизлигини таъминлаш кўрсаткичларини баҳолаш ва бу борада тегишли ташхисларни қўйиб боришни таъминлаш лозим. Иккинчидан, хўжалик юртувчи субъектларнинг барқарор ўсишини таъминлаш мақсадида муттасил равишда уларда меҳнат унумдорлигининг ошиб боришига эришиш. Учинчидан, корхонанинг ликвидлиги ва даромадлилик даражасини ҳамиша назорат қилиб бориш ва уларнинг пасаймаслик чораларини кўриш. Тўртинчидан, корхонадаги турли рискларни баҳолаш ва уларнинг олдини олиш чораларини кўриш, унда бозор, баҳо, таннарх масалаларига эътиборни қаратиш. Бешинчидан, корхонанинг молиявий мувозанатини назорат қилиб бориш, олинган даромадларига яраша буромадни таъминлаш, ортиқча сарфларга йўл қўймаслик. Олтинчидан, ҳар бир корхонада иқтисодий хавфсизликни таъминлашни бошқаришни йўлга қўйиш ва буни бирор кун ҳам назардан қолдирмаслик кўникмасини шакллантириш. Еттинчидан, инновацион жараёнларни бошқариш билан бирга корхонанинг стротегик йўналишини белгилаб олиш.
Юқорида келтирилган чораларнинг ҳаммаси корхоналарда иқтисодий хавфсизликни таъминлаш билан боғлиқ концепцияни амалга оширишга хизмат қилади.

4. 
   Корхона иқтисодий хавфсизлигини таъминлаш тамойиллари, ташкил этиш ва бошқариш
   

Корхонанинг иқтисодий хавфсизлиги тамойиллари ҳам иқтисодий адабиётларда кам ёритилган масалалар сирасига киради. Ҳар бир хўжалик юритувчи субъектларда хавфсизликни, шу жумладан иқтисодий хавфсизликни таъминлаш учун уни амалга оширишда маълум тамойилларга таянилади. Бу тамойиллар корхона ишининг тактикаси ва стратегиясини, аниқ мақсад ва вазифалар билан фаолият кўрсатишини белгилаб олишида намоён бўлади.

Корхона иқтисодий хавфсизлигини таъминлаш тамойиллари, уларни ташкил этиш ва бошқариш масаласи қаралганда унинг иқтисодий, сиёсий ва социал, техник, экологик, ахборот соҳаларини инобатга олиш лозим бўлади. Хавфсизликни таъминлашда қатъий қонунга амал қилиш тамойилига асосланиши лозим. Қонун бузулган жойда хавфсизлик ҳақида гапиришнинг ўзи бефойда. Шу туфайли қонунга амал қилиш масаласи ҳар бир корхонанинг қонуни даражасида бўлиши керак. Яна шуни эътироф этиш керакки, хўжалик фаолиятида қонун доирасида ҳаракат қилиш корхонанинг барқарорлигини ҳам таъминлайди.
Шу нуқтаи назардан қарайдиган бўлса, корхонанинг иқтисодий хавфсизлиги қуйидаги тамойилларга таянади (12.2-расм).