Andijon davlat tibbiyot instituti

Linimentlar (suyuq surtmalar) - Linimenta
(Liniment - bosh kelishik birlikda Linimentum, qaratqich kelishik birlikda Linimenti, qisqartmasi-Linim.)

Linimentlar suyuq dori shakli bo‘lib, sirtdan ishlatishga mo‘ljallangan sutsimon suyuqlikdir. Teri va bo‘g‘inlarga oz-ozdan ishqalab, singdirib surkaladi, ya’ni singdiriladi. Linimentlarning ba’zilari emulsiyasimon (aloe linimenti, ammiakli liniment, naftalgin linimenti), ba’zilari suspenziyasimon (A.V.Vishnevskiy balzamik linimenti), ba’zilari emulsiya-suspenziyasimon (sintomitsin, streptotsid linimenti), ba’zilari miksturalar (metilsatsilat murakkab linimenti, skipidar murakkab linimenti, sanitas linimenti) sifatida bo‘ladi.

Ba’zi linimentlar quyuq jelesimon bo‘lib tana haroratida suyuladi, bunday linimentlar opodeldoklar (italiyancha - tajribali inson maxsuloti) deyiladi va yumshoq dorilar hisoblanadi.
Linimentlar asosan sanoatda tayyor holda chiqariladi, ularga retsept qisqartirilgan ko‘rinishda yoziladi.
Misol: 25 ml ofitsinal 5% li sintomitsin linimenti (Linimentum Synthomicini, Chloramphenicol)ni terining jarohatlangan qismiga ishqalab, singdirib surkash uchun buyurilsin. Qo‘llashdan oldin chayqatilsin.

Rp.: Linim. Synthomycini 5% - 25 ml

(Chloramphenicol)
D.S. Terining jarohatlangan qismiga ishqalab, singdirib
surkash uchun. Qo‘llashdan oldin chayqatilsin.

Magistral linimentlar kengaytirilgan ko‘rinishda yoziladi. Tarkibiy qismlarning nomi va miqdoridan keyin M.f. linimentum (liniment hosil bo‘lguncha aralashtir) va D.S. bilan tugallanadi.

Misol: 20 ml xloroform (Chloroformium, Chloroformium), 40 ml mingdevona moyi (Oleum Hyosyami, Hyoscyamus niger)dan iborat linimentni bo‘g‘inlarning jarohatlangan joyiga ishqalab, singdirib surkash uchun buyurilsin. Qo‘llashdan oldin chayqatilsin.

Rp.: Chloroformii 20 ml

(Chloroformium)
Olei Hyoscyami 40 ml
(Hyoscyamus niger)
M.f. linimentum
D.S. Bo‘g‘inlarning jarohatlangan qismlariga
ishqalab, sindirib surkash uchun.
Qo‘llashdan oldin chayqatilsin.