Analitik, fizik-kolloid va biologik kimyo

Atseton molekulasi nisbiy chastotasining (ν') elektron energiyasiga bog‘liqligi.
Mass-spektrometriyaning qo‘llanilishi. Usul organik va anorganik uchuvchan moddalarni analiz qilish uchun ishlatiladi. Ko‘pchilik organik moddalar 2·10^-4–1,33·10^-2 Pa bosimda bug‘ holatiga o‘tadi. Yuqori molekulyar polimer moddalar va qutblangan guruhlarga ega bo‘lgan birikmalar termik parchalanadi. Shu bois, polimerlarni tekshirganda piroliz reaksiyasi mahsulotlari bilan cheklanishga to‘g‘ri keladi.

Analiz uchun, odatda, 1 mg atrofidagi modda etarli. Agar analiz qilinadigan modda analizatorga bevosita kiritilsa, uning mikrogramm miqdorlari ham etarli bo‘ladi. Analiz uchun olinadigan moddalarning tozalik darajasi ham katta ahamiyatga ega. Agar tarkibida kam miqdorda begona moddalar bo‘lgan namunaning sifat tarkibi tekshirilayotgan bo‘lsa, begona modda bunday analizga xalaqit bermaydi. Agar namunaning ifloslanish darajasi yuqori bo‘lsa, bunday moddani analiz qilishda spektrlarni talqin qilish qiyinlashadi. Tekshiriladigan namunaning tozalik darajasini ham mass-spektrometrik usulda baholash mumkin. Buning uchun moddani analizatorga kiritishning boshi va oxiridagi spektrlari solishtiriladi.

Spektrlarning farq qilishi moddaning ko‘p tarkibligini ko‘rsatadi. Mass-analizatordagi turli gazlar (kislorod, azot, argon va boshqa), oldingi analizdan qolgan moddalar namuna kiritilmagan vaqtda ham tegishli spektrlarni hosil qilishi mumkin. Shuning uchun ham, avvalo, fonning spektri tushiriladi. Tekshiriladigan modda tarkibidagi iflosliklarning va fonning ta’sirini yo‘qotish uchun erituvchi va tekshiriladigan namunadan ko‘proq olish, ayrim hollarda analizni boshlashdan oldin bir necha soat davomida ishlab turgan nasos bilan mass-analizatorni yuqori haroratda saqlab turish zarur bo‘ladi.

Spektral chiziqlarning massa sonlariga to‘g‘ri kelishini aniqlash uchun tegishli standart moddalarning spektrlaridan foydalaniladi.

Mass-spektrometriya usuli izotoplarni, uglevodorodlar gomologlarini, moddalarning molekulyar massalarini, ularning struktur formulalarini aniqlash uchun ishlatiladi.