Abbatisa – ayollar katolik monastirlarining boshqaruvchilari. Abbatlik

Shevalye – oʻrta asrlar Fransiyasida dvoryanlik unvoni.
Shlyaxta (polyak, nemis. urugʻ) – Polsha qirolligi, Buyuk Litva knyazligi va 1569-yilgi Lyublin uniyasidan keyin Rech Pospolitada va bir qancha davlatlarda imtiyozli tabaqa. Polshada Sh. dastlab harbiy tabaqani, qirol qoʻshinining asosiy jangovar qismi boʻlgan ritsarlarni tashkil qilgan. Borgan sari davlat ularga koʻplab imtiyozlar berishi natijasida ular monarxiyaning keyingi hayotini belgilab beruvchi kuchga aylandi.
Shtaufenlar – 1138-1268-yillarda Germaniya qirollari va “Muqaddas Rim imperiyasi” imperatorlarining sulolasi. Fridrix I Barbarosa, uning oʻgʻli Genrix VI , Genrixning oʻgʻli Fridrix II, Fridrix II ning oʻgʻli Konrad IV ushbu sulola vakillari hisoblanadi. Germaniyada Sh. boshqaruvi davrida markaziy hokimiyat kuchsizlangan, mahalliy hokimliklarning mustaqillik uchun kurashi kuchaygan. Sh. Shimoliy Italiya shaharlari va Rim papasi bilan urushlar sababli faol siyosat olib borgan. Sh.ning papa bilan nizoga borishi ularni inqirozga uchratgan. 1268-yilda papa Kliment IV ning buyrugʻiga binoan Fridrix II ning vorisi 14 yoshli Konrad va xonadoning boshqa vakillari qatl etilgan.
Shvabiya – ilk oʻrta asrlarda allemanlar yashagan hudud; X asrdan gersoglik (dastlab Alemaniya deb atalgan); oʻz tarkibiga Vyurtemberg, Baden, Elzas hududlarini hamda Bavariya, Shveytsariya va Italiyaning bir qismini qamrab olgan. XIII asrda diniy va dunyoviy knyazliklarga boʻlinib ketgan.
Shvabiya ittifoqi – Germaniya janubi-gʻarbidagi magnatlarining harbiy-siyosiy birlashmasi. 1488-yil fevralda Eslingenda (Shvabiyada) imperiya ritsarlari va imperiya shaharlari oʻrtasida tuzilgan. Keyinchalik unga Mayns, Triris, Pfals kurfyuristlari, Gessin landgrafi, Bavariya gersogi va boshqalar qoʻshilgan. Sh.I. mamlakatni markazlashtirish uchun bir necha islohotlar amalga oshirish uchun kurash olib borgan. 1533-yil oxiri – 1534-yil boshida tarqab ketgan.
Shvank – oʻrta asr nemis shahar adabiyoti janri. Fransuzlarning fabliosiga oʻxshash. U asosan bir oz kulgili qoʻshiqlardan, nasr va satiradan iborat boʻlgan. Sh. XIII asrda Germaniyada vujudga kelgan. Avstriyalik shoir Shtrikera (XIII asr oʻrtasi) ijodida rivoj topgan.