A. M. Karimova, D. M. Malikova pul va banklar

Kapital qoʻyilmalarning manbalari - korxona, birlashmalarning oʻz mablag’lari, byudjet mablag’lari, va bank krediti.
Kapital ta’mirlash - asosiy vositalarni yirik koʻlamda butkul detallari, qismlarini almashtirish bilan bog’liq qayta ta’mirlash.
Kard ul-Xasan (hayriya krediti) - tashkilot yoki shaxslarga taqdim etiladigan foizsiz ssudalar. Agar shaxsning berilgan ssudaning qaytara olmasligi avvaldan aniq boʻlsa, pullar majburiyat yoki ixtiyoriy hayriya shaklida.
Qayta moliyalash siyosati - 1. Markaziy bankning oʻzi belgilangan shartlarda tijorat banklariga uch oygacha boʻlgan muddatga beradigan kreditlarni tartibga solish siyosati. Markaziy bank oʻzining qayta moliyalash tizimida banklarning ishtirok etish shartlarini e’lon qiladi. 2. Markaziy bank tomonidan kredit institutlarining veksellarni sotib olish shakli va qimmatbaho qog’ozlarni garovga olish yoʻli bilan kreditlash tushuniladi.
Qarz - 1. Tashkilotlarning xoʻjalik faoliyatlarni yuritish natijasida vujudga kelgan, tegishli huquqiy va jismoniy shaxslarga toʻlanishi lozim boʻlgan qarz summasi. 2. Qaytarish sharti bilan berilgan yoki olingan pul, tovar kabilar. 3. Zimmadagi vazifa, burch.
Kasod - 1. Talab yoki xaridor yoʻqligi bois, tovarlarning bozorida sotilmay qolishi natijasida zarar koʻrish. 2. Kasofat, zarar.
Kepakiy -chig’atoy xonlaridan Kepakxon (1318-1326y.) zamonida chiqarilgan oltin kumush tanga.
Qiymat - tovarda mujassamlashgan ijtimoiy mehnat sarfidir. Faqatgina ijtimoiy zaruriy ish vaqti jamiyat ehtiyojini qondirish uchun kerak boʻlgan vaqtdir. Shu sababli, bu vaqtni anglatuvchi qiymatni bozor tan oladi.
Qiymat qonuni - tovarlarga sarflangan mehnat bilan ularning qiymatlari oʻrtasidagi mohiyatli bog’lanish boʻlib, tovarlarga sarflangan ijtimoiy zaruriy mehnatning koʻpayishi tovar qiymatining ham koʻpayishiga olib kelishini ifodalaydi.
Kichik biznes sub’yektlari - korxona koʻlami, ishlab chiqarish hajmi, ishlovchilar soni, moliyaviy mablag’lari miqdori va boshqalar jihatidan imkoniyatlari cheklangan ishlab chiqaruvchi sub`yektlar. Respublikamizda sanoat ishlab chiqarishning ayrim tarmoqlarida (masalan, yengil va oziq-ovqat sanoati, metallga ishlov berish va asbobsozlik sanoati va h.k.) 100 kishigacha, ayrimlarida (masalan, mashinasozlik, metallurgiya, yoqilg’i-energetika sanoati va boshqalarda) 50 kishigacha, xizmat koʻrsatish sohasida 25 kishigacha ishlovchi korxonalar kichik biznes sub’yektlari hisoblanadi.