A. I. Umirdinov, A. M. Xakimov xalqaro ommaviy huquq sud amaliyoti o‘quv-uslubiy qo‘llanma (keyslar to‘plami) toshkent – 2018

13-modda
Bitimning qonuniy kuchga kirishi
Har bir Ahdlashuvchi Tomon Bitimning qonuniy kuchga kirishi uchun talab etiladigan o‘zining ichki tartibotlari tugaganligi to‘g‘risida boshqa Ahdlashuvchi Tomonni diplomatik kanallari orqali yozma ravishda xabardor qiladi. Boshqa Ahdlashuvchi Tomon bu haqda xabarnoma olgan kundan boshlab Bitim qonuniy kuchga kiradi.
14-modda
Bitimning amalda bo‘lish va uni harakatdan to‘xtatish muddatlari
Mazkur Bitim o‘n yil davomida qonuniy kuchga ega hisoblanadi.
Agar Tomonlar ushbu Bitimni harakatdan to‘xtatish to‘g‘risida yozma ravishda xabar qilmasalar, u o‘n yillik muddat tugagandan so‘ng o‘z kuchida qoladi, oradan 12 oy o‘tgach esa Bitim bekor qilinadi. Mazkur Bitim kuchga ega bo‘lgan davrda amalga oshirilgan investitsiyalarga nisbatan Bitim qoidalarining kuchi Bitim harakatdan to‘xtatilgan sanadan so‘ng o‘n yillik muddat mobaynida ham saqlanib qoladi va ular umumiy xalqaro huquq qoidalariga muvofiq ravishda qo‘llaniladi.
Ushbu Bitimni o‘z Hukumatlari Tomonidan lozim darajada vakolat olgan shaxslar quyida imzo chekuvchilar guvohligida imzoladilar.
Toshkent shahrida, 1994-yil 4-iyulida, ya’ni 5754-yilda, ikki nusxada tuzilgan, har biri o‘zbek, ivrit va ingliz tilida yozilgan, barcha matnlar bir xil kuchga ega. Matnlar talqinida kelishmovchiliklar yuzaga kelsa, ingliz tilidagi Bitim ustun kuchga ega hisoblanadi.

Atamalar lug‘ati (Glossary)

“Adolatli va xolis munosabatda bo‘lish mezoni” (Fair and equitable treatment, FET) – bu Xalqaro odat huquqidagi minimum standartlarning bir qismi bo‘lib, asosan xorijiy investorlarga nisbatan mezbon mamlakatlar tomonidan ma’lum bir qulay muhit yaratish va kamsitishlarga yo‘l qo‘yilmasligi lozimligini talab qiluvchi tamoyildir.
Ad hoc arbitraji – bu nizolashuvchi taraflar tomonidan tanlangan arbitrlar tomonidan ularning nizolari hal etiladigan va vaqtincha faoliyat ko‘rsatadigan arbitrajdir. Ad hoc arbitrajlarida taraflar protsessual qoidalar hamda qo‘llaniladigan huquqni ham o‘zlari tanlashlari mumkin bo‘ladi.